COP17-ын Ногоон бүс нь олон нийтэд нээлттэй, оролцоонд суурилсан талбар бөгөөд иргэд, хувийн хэвшил, иргэний нийгэм, залуучууд, эрдэм шинжилгээний байгууллагуудыг нэг дор холбож, байгаль орчны шийдэл, инновац, сайн туршлага, хамтын ажиллагааг олон нийтэд хүргэх зорилготой.
Энд байгаль орчны шийдэл, шинэ санаа, инновац, сайн туршлага, төсөл хөтөлбөрүүдийг олон нийтэд танилцуулж, оролцогч талууд туршлага солилцох, хамтын ажиллагаа өрнүүлэх боломж бүрдэнэ.
Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр: Ногоон бүс нь иргэн бүр иргэний үнэмлэхээ үзүүлэн чөлөөтэй нэвтэрч, байгаль орчин, газрын доройтол, уур амьсгалын өөрчлөлт, тогтвортой хөгжлийн чиглэлээр хэрэгжүүлж буй шинэлэг санаачилга, шийдэл, технологитой танилцах, олон талын мэдээлэл, мэдлэгийг нэг дороос авах боломжийг бүрдүүлсэн онцлог талбар юм. Ялангуяа иргэд, тэр дундаа залуучууд дэлхий нийтийн өмнө тулгамдаж буй байгаль орчны асуудлыг зөвхөн онолоор бус, бодит төсөл, хэрэгжиж буй шийдэл, шинэ технологийн жишээн дээрээс ойлгож, өөрсдийн оролцоогоо нэмэгдүүлэх боломжтой байгаа нь Ногоон бүсийн хамгийн чухал ач холбогдол гэж харж байна.
“Хүнсний хувьсгал” ТББ-ын хамт олон Ногоон бүсийн 16 дугаар павильонд байрлан, хүнсний салбарын тогтвортой хөгжил, байгаль орчинд ээлтэй үйлдвэрлэл, зөв зохистой хэрэглээний талаарх үйл ажиллагаа, хэрэгжүүлж буй төсөл, санаачилгаа олон нийтэд танилцуулж байна.
Иргэн та чиглэлийн автобус болон Үндэсний цэцэрлэг хүрээлэнгийн зүүн хойд хаалгаар нэвтэрч СОР17 иргэдийг хүлээн авах цэгээс зориулалтын ГОЛЬФ КАРТ буюу жижиг цахилгаан машинд сууж ирэх боломжтой.
Ногоон бүс хурлын турш буюу 8 дугаар сарын 28 хүртэл иргэдэд нээлттэй.
ХӨРС ЭРҮҮЛ БОЛ ХҮНС ЭРҮҮЛ
