НҮБ-ын Цөлжилттэй тэмцэх конвенцын Талуудын 17 дугаар бага хурал (UNCCD COP17) Улаанбаатар хотноо үргэлжилж байна. 2026 оны наймдугаар сарын 17-28-ны өдрүүдэд зохион байгуулагдаж буй тус хуралд дэлхийн 197 талын төлөөлөл оролцож, газрын доройтол, цөлжилт, гангийн эрсдэл, ус, бэлчээр, хүнсний тогтолцооны тогтвортой байдлын асуудлыг хэлэлцэж байна.

Энэ хүрээнд Монгол Улсын Ерөнхийлөгчийн санаачилсан “Хүнсний хувьсгал” үндэсний хөдөлгөөний ажлын хэсэг COP17-ын “Ногоон бүс”-ийн 16 дугаар павильонд үйл ажиллагаагаа танилцуулж, хүнсний үйлдвэрлэл, боловсруулах үйлдвэрлэл, газар тариалан, мал аж ахуй, үндэсний үйлдвэрлэгчдийн оролцоог олон нийт болон олон улсын зочид төлөөлөгчдөд хүргэн ажиллаж байна.

“Ногоон бүс” нь COP17-ын хүрээнд олон нийт, бизнес эрхлэгчид, иргэний нийгэм болон бусад оролцогч талууд уулзаж, газрын доройтлыг бууруулах, нөхөн сэргээх, тогтвортой хөгжлийн шийдлүүдийг танилцуулах нээлттэй талбар болж байгаа юм.

“Хүнсний хувьсгал” хөдөлгөөний Удирдах зөвлөлийн гишүүд Ногоон бүсийн 16 дугаар павильонд ажиллаж, хөдөлгөөний хүрээнд хэрэгжиж буй ажлын явц, үндэсний үйлдвэрлэгчдийн бүтээгдэхүүн, хүнсний үйлдвэрлэлийн өнөөгийн нөхцөл байдал болон цаашдын боломжийн талаар танилцлаа.

Энэ үеэр:

• Монгол Улсын Ерөнхийлөгчийн Үйлдвэр, үйлчилгээний бодлогын зөвлөх, “Хүнсний хувьсгал” ТББ-ын Тэргүүн бөгөөд УЗ-ийн дарга Ч.Даваабаяр
• “Хүнсний хувьсгал” ТББ-ын Дэд тэргүүн Т.Мөнхтөр,
• Удирдах зөвлөлийн гишүүн, тэргүүлэгч “ХАА-н тоног төхөөрөмжийн дилер холбоо”-ны Тэргүүн, Монгол Улсын Хөдөө аж ахуйн гавьяат ажилтан Ц.Рэнчинсэнгээ
• Удирдах зөвлөлийн гишүүн, “Монголын кулинарын холбоо нийгэмлэг”-ийн Тэргүүн, “Нүхт-Тур” ХХК-ийн Гүйцэтгэх захирал, Монгол Улсын Үйлчилгээний гавьяат ажилтан Н.Хандсүрэн
• Удирдах зөвлөлийн гишүүн, “Мөнх ногоон тал” ХХК-ийн Захирал Д.Давааням
• Удирдах зөвлөлийн гишүүн, “Монголын Зөгийчдийн холбоо”-ны Тэргүүн, “Зээш Гарден” ХХК-ийн Гүйцэтгэх захирал Б.Занданхүү нар Ногоон бүсийн 16 дугаар павильонд хүрэлцэн ирж “Хүнсний хувьсгал” хөдөлгөөний COP17 дахь оролцоо, павильонд танилцуулж буй үйл ажиллагаатай танилцаж, үндэсний үйлдвэрлэгчид, хүнсний салбарын төлөөллийн оролцоог дэмжин, энэхүү олон улсын арга хэмжээнд салбарынхаа дуу хоолойг хүргэж буй үйл явцад хамт байлаа.

Тэд хүнсний үйлдвэрлэл эрхлэгчид, үйлдвэрлэгчид болон салбарын төлөөлөлтэй санал солилцож, хүнсний үйлдвэрлэлийг байгальд ээлтэй, нөөцийн хэмнэлттэй, тогтвортой хөгжлийн зарчимтай уялдуулах шаардлагын талаар ярилцлаа. Мөн Монголын хүнсний салбарын давуу тал, үндэсний үйлдвэрлэгчдийн бүтээгдэхүүн, цаашид олон улсын зах зээлд гарах боломж, хамтын ажиллагааны чиглэлүүдийн талаар мэдээлэл солилцсон юм.