COP17-ын хэлэлцүүлэг нь зөвхөн цөлжилт, газрын доройтлын асуудлаар хязгаарлагдахгүй бөгөөд хүнсний систем, хөрсний эрүүл мэнд, тогтвортой газар тариалан, усны нөөц, бэлчээрийн менежмент, хүнсний аюулгүй байдал зэрэг асуудлыг хооронд нь уялдуулан авч үзэж байна. Тус хурлын хөтөлбөрт “Food Systems and Soil Health” сэдвээр тусгай өндөр түвшний хэлэлцүүлэг багтсан нь хүнсний үйлдвэрлэл болон газрын тогтвортой менежментийн уялдаа улам бүр чухал болж байгааг харуулж байна.

Иймээс COP17-ын үр дүн Монголын хүнсний салбарт хэд хэдэн чухал боломжийг бий болгох хүлээлттэй байна.

Нэгдүгээрт, уур амьсгалын өөрчлөлт, газрын доройтолд дасан зохицсон хүнсний үйлдвэрлэлийн технологи, арга туршлагыг нэвтрүүлэх боломж нэмэгдэнэ. Хөрсний эрүүл мэндийг хамгаалах, усны хэмнэлттэй технологи ашиглах, тогтвортой газар тариалан эрхлэх зэрэг чиглэлд олон улсын туршлага, мэдлэг, технологийн хамтын ажиллагаа өргөжих боломжтой.

Хоёрдугаарт, хүнсний үйлдвэрлэлд чиглэсэн олон улсын хөрөнгө оруулалт, санхүүжилтийн шинэ боломжууд нээгдэх ач холбогдолтой. COP17-ын гол зорилтуудын нэг нь газрын нөхөн сэргээлт, гангийн тэсвэржилт болон хүнсний тогтолцооны тогтвортой байдлыг дэмжих хөрөнгө оруулалт, түншлэлийг нэмэгдүүлэхэд чиглэж байна.

Гуравдугаарт, малчин–тариаланч–боловсруулагч–үйлдвэрлэгчийн уялдаа холбоог бэхжүүлэх боломж бүрдэнэ. Монгол Улсын хувьд бэлчээрийн мал аж ахуй, газар тариалан, хүнсний боловсруулах үйлдвэрлэл нь газрын нөөц, ус, уур амьсгалын өөрчлөлттэй шууд холбоотой учраас салбар хоорондын уялдаа улам чухал болж байна. COP17-ын хүрээнд бэлчээрийн тогтвортой менежмент, хүнсний системийн асуудлыг хамтад нь хэлэлцэж байгаа нь Монголын нөхцөлд онцгой ач холбогдолтой.

Дөрөвдүгээрт, Монголын үндэсний үйлдвэрлэгчдийг олон улсын түвшинд сурталчлах, шинэ зах зээл, түншлэлд холбох боломж нэмэгдэнэ. “Ногоон бүс”-ийн үйл ажиллагаа нь бизнес эрхлэгчид, олон улсын байгууллага, хөрөнгө оруулагчид болон олон нийтэд үндэсний үйлдвэрлэгчдийн хийж буй ажлыг танилцуулах чухал талбар болж байна.

Тиймээс COP17-ын хүрээнд “Хүнсний хувьсгал” хөдөлгөөний оролцоо нь зөвхөн өнөөдрийн үйл ажиллагааг сурталчлах төдий бус, Монголын хүнсний салбарыг илүү тогтвортой, байгальд ээлтэй, өрсөлдөх чадвартай үйлдвэрлэлийн тогтолцоо болгон хөгжүүлэх олон улсын хамтын ажиллагааны шинэ боломжийг эрэлхийлж буй алхам юм.

Цаашид COP17-ын үеэр бий болсон харилцаа холбоо, туршлага, түншлэлийг бодит төсөл, хөрөнгө оруулалт, технологийн шилжилт болон үйлдвэрлэгчдэд хүрэх шийдэл болгон хэрэгжүүлэх нь “Хүнсний хувьсгал” үндэсний хөдөлгөөний дараагийн чухал зорилтын нэг байх юм.