Өмнөговь аймаг говийн бүсийн усны нөөцийг хамгаалах, нэмэгдүүлэх, хур тунадас болон үерийн усыг хуримтлуулах чиглэлээр хэрэгжүүлж буй бодлого, туршлагаа COP17-гийн оролцогчдод танилцууллаа.

Өмнөговь аймгийн ИТХ-ын тогтоолоор “Говь+Ус” хөтөлбөрийг 2021 онд батлан хэрэгжүүлж эхэлсэн бөгөөд 2025 оны наймдугаар сарын 7-нд шинэчлэн баталжээ. Энэ хөтөлбөр нь усны нөөцийн хомсдолоос урьдчилан сэргийлэх, боломжит нөөцийг зүй зохистой ашиглах, гадаргын усыг хуримтлуулах замаар хүн ам, уул уурхай, хөдөө аж ахуйн усны хэрэгцээг тогтвортой хангах нөхцөлийг бүрдүүлэхэд чиглэж байна. Хөтөлбөрийн хүрээнд хур тунадас, үерийн усыг тогтоон хуримтлуулах, усны нөөцийг нэмэгдүүлэх зорилгоор хөв цөөрөм байгуулах ажлыг үе шаттай хэрэгжүүлж байгаа юм. Тодруулбал, 2021 оноос хойш 14 сумын нутагт нийт 23 хөв цөөрөм байгуулж, 3.12 сая м.куб гадаргын ус хуримтлуулах боломжийг бүрдүүлжээ.

Энэ нь хур бороо, үерийн усыг тогтоон барихаас гадна хөрсний чийг, бэлчээрийн усан хангамжийг нэмэгдүүлэх, мал аж ахуй, газар тариаланд ашиглах, зэрлэг ан амьтдын усны эх үүсвэрийг нэмэгдүүлэх ач холбогдолтой. Мөн газрын доройтол, цөлжилтийг сааруулах, уур амьсгалын өөрчлөлтөд дасан зохицох байгальд түшиглэсэн шийдэл болж байна.

Тухайлбал, Баяндалай суманд орон нутгийн төсвийн 761 сая төгрөгийн хөрөнгөөр 46 мянган м³ ус хуримтлуулах хүчин чадалтай хөв цөөрөм байгуулсан бол Сэврэй суманд усны нөөц ашигласны төлбөрийн орлогоор 1.8 метрийн гүнтэй хөв цөөрөм байгуулж, 6500 м³ ус хуримтлуулжээ.

Цаашид Ханбогд, Ханхонгор, Баяндалай, Даланзадгад, Гурвантэс, Сэврэй суманд нийт 1.2 сая м³-ээс дээш багтаамжтай хөв цөөрөм байгуулахаар зураг төсөл боловсруулж байна. Мөн 2026 онд Булган суманд хөв цөөрөм байгуулах 1.09 тэрбум төгрөгийн төсөвт өртөгтэй ажил зарлажээ.

Өмнөговь аймаг говийн бүсийн усны хомсдлыг бууруулахад гадаргын усыг хуримтлуулах, байгалийн усны горимыг зохистой ашиглах, булаг шандын эхийг хамгаалах нь чухал гэж үзэж, хэрэгжүүлсэн ажлын үр дүн, туршлагаа COP17-ын хүрээнд танилцуулсан байна.

Эх сурвалж: Монцамэ агентлаг