Өмнөговь аймгийн хэрэглээний бараа, үйлчилгээний үнэ энэ оны наймдугаар сарын байдлаар өмнөх оны мөн үеэс 13.6 хувиар өссөн талаар Өмнөговь аймгийн Статистикийн газраас мэдээллээ.
Ерөнхий индекс 13.6 хувиар өсөхөд хүнсний бараа, согтууруулах бус ундааны үнэ 20.5 хувь, тээврийн үнэ 20.2 хувь, согтууруулах ундаа, тамхины үнэ 18.0 хувиар өссөн нь голлон нөлөөлжээ.
Мөн хувцас, бөс бараа, гутлын үнэ 9.9 хувь, боловсролын үйлчилгээний үнэ 11.8 хувь, эм, тариа, эмнэлгийн үйлчилгээний бүлгийн үнэ 6.3 хувь, зочид буудал, нийтийн хоол, дотуур байрны үйлчилгээний үнэ 5.5 хувь, гэр ахуйн барааны үнэ 8.3 хувь, бусад бараа, үйлчилгээний үнэ 5.1 хувиар өссөн байна.
Үүнтэй зэрэгцэн аймгийн малын зах зээлийн дундаж үнийн мэдээллээс үзэхэд 2026 оны долоодугаар сард нас гүйцсэн эр тэмээний үнэ өмнөх оны мөн үеэс 1 сая төгрөгөөр буюу 77.8 хувиар өсөж, 2,4 сая төгрөгт хүрчээ. Харин ингэн тэмээ 500 мянган төгрөгөөр буюу 38.5 хувь, эр хонины үнэ 190 мянган төгрөгөөр буюу 55.8 хувь, эм хонины үнэ 176 мянган төгрөгөөр буюу 66.4 хувь, эр ямааны үнэ 136 мянган төгрөгөөр буюу 55.8 хувь, эм ямааны үнэ 117 мянган төгрөгөөр буюу 63.2 хувиар өссөн байна.
Ийнхүү хэрэглээний бараа, үйлчилгээний үнэ болон малын зах зээлийн үнэ өмнөх оны мөн үеэс өссөн нь аймгийн өрхийн хэрэглээ, орлоготой холбоотой эдийн засгийн үзүүлэлтүүдэд тодорхой хэмжээгээр нөлөөлөхөөр байгаа юм.
Эх сурвалж: Монцамэ агентлаг
