“Хүнсний хувьсгал” хэлэлцүүлэг 2026.08.27-ны өдрийн 16:10–17:40 цагт Ногоон бүсийн “ӨГӨДЭЙ” танхимд болно.

НҮБ-ын Цөлжилттэй тэмцэх тухай конвенцын Талуудын 17 дугаар бага хурлын хүрээнд зохион байгуулагдах “Хүнсний хувьсгал” хэлэлцүүлэг нь газрын доройтол, цөлжилттэй тэмцэх асуудлыг хүнсний үйлдвэрлэл, хүнсний аюулгүй байдал, тогтвортой хүнсний тогтолцоотой уялдуулан хэлэлцэхэд чиглэнэ.

Энэ хүрээнд “Хүнсний хувьсгал” хэлэлцүүлгээр газрын доройтлыг бууруулах, хөрсийг хамгаалах, үйлдвэрлэлийн тогтвортой байдлыг хангахын зэрэгцээ хүнсний үйлдвэрлэл, боловсруулалт, нийлүүлэлтийн тогтолцоог хэрхэн шинэчлэх вэ гэдэг асуудлыг цогцоор нь авч үзнэ.

Газрын доройтол нь зөвхөн байгаль орчны асуудал бус, хүнсний үйлдвэрлэл, мал аж ахуй, газар тариалан, иргэдийн амьжиргаа, цаашлаад хүнсний аюулгүй байдалд шууд нөлөөлдөг. Хөрсний чанар муудаж, бэлчээрийн даац хэтэрч, усны нөөц багасахын хэрээр хүнс үйлдвэрлэх боломж хумигддаг. Тиймээс газрыг хамгаалах, нөхөн сэргээх бодлого нь тогтвортой хүнсний тогтолцоог бүрдүүлэх чухал үндэс болж байна.

Хүнсний үйлдвэрлэлийн үндэс нь эрүүл хөрс, хангалттай ус, үржил шимтэй газар, тогтвортой экосистем юм. Хөрсний чанар доройтож, бэлчээрийн даац хэтэрч, усны хүртээмж буурч, ган, зуд болон уур амьсгалын эрсдэл нэмэгдэхийн хэрээр хүнс үйлдвэрлэх чадавх буурдаг.

Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр: Хүнсний хувьсгал гэдэг нь нэг зорилгын төлөө олон талын оролцоог нэг системд холбох өөрчлөлт юм.

Иймээс газрын доройтол нь зөвхөн байгаль орчны асуудал биш бөгөөд:

• хүнсний үйлдвэрлэлийн хэмжээ, чанарт;
• мал аж ахуй, газар тариалангийн бүтээмжид;
• хүнсний үнэ, хүртээмжид;
• малчид, тариаланчдын орлогод;
• орон нутгийн иргэдийн амьжиргаанд;
• хүнсний нийлүүлэлтийн тогтвортой байдалд;
• улмаар үндэсний хүнсний аюулгүй байдалд шууд болон шууд бусаар нөлөөлдөг.

“Хүнсний хувьсгал” хэлэлцүүлгээр:

1. Газрын доройтол ба хүнсний аюулгүй байдлын уялдааг тодорхойлох;
2. Тогтвортой хүнсний үйлдвэрлэлийн тэргүүлэх чиглэлүүдийг тодорхойлох;
3. Хөрс, бэлчээр, усны нөөцийг хамгаалах үйлдвэрлэлийн шийдлүүдийг хэлэлцэх;
4. Хүнсний үйлдвэрлэлээс боловсруулалт, нийлүүлэлт хүртэлх үнэ цэнийн сүлжээний шинэчлэлийн боломжийг тодорхойлох;
5. Монголын сайн туршлага, инновацийг олон улсын түвшинд таниулах;
6. Төр, хувийн хэвшил, олон улсын байгууллагын хамтын ажиллагааг өргөжүүлэх;
7. COP17-ийн “Restoring Land. Restoring Hope.” зорилтыг хүнсний тогтолцооны бодит үйл ажиллагаатай холбох;
8. Цаашид хэрэгжүүлэх боломжтой санал, санаачилга, түншлэлийн чиглэлүүдийг тодорхойлох зэрэг асуудлаар өргөн хүрээнд хэлэлцэнэ.