Орхон аймагт энэ жилийн бэлчээрийн ургамлын ургалт сайн, газар тариалангийн ургацын төлөв эерэг байна. Урьдчилсан балансаар 3753 га талбайгаас 9806 тонн үр тариа хураан авах төлөвтэй бөгөөд эрт ургацын төмс, хүнсний ногоог орон нутгийн зах зээлд нийлүүлж эхэлжээ.
Монгол Улсын Засгийн газрын 2026 оны 286 дугаар тогтоол, Орхон аймгийн Засаг даргын баталсан “Хөдөө аж ахуйн салбарын 2026-2027 оны өвөлжилт, хаваржилтын бэлтгэл хангах тухай” төлөвлөгөөний хүрээнд аймгийн Хүнс, хөдөө аж ахуйн газар өвөлжилтийн бэлтгэл болон ургацын төлөв байдлыг тодорхойлох ажлыг зохион байгуулж байна.
Аймгийн Хүнс, хөдөө аж ахуйн газар Ус цаг уур, орчны шинжилгээний газартай хамтран Баян-Өндөр сумын Эрдэнэ, Баянцагаан, Говил, Зэст баг болон Жаргалант сумын Дулааны энгэр, Тасаг, Хойд булаг, Шувуут зэрэг нутгийн нийт 4000 га бэлчээрийн талбайд ургац, даацын судалгаа хийжээ.
Судалгаагаар энэ жилийн бэлчээрийн ургамлын дундаж өндөр 12-15 см байгаа бөгөөд ургалтын байдал сайн гэж үнэлсэн байна. Мөн аймгийн Хүнс, хөдөө аж ахуйн газар, Жаргалант сумын Засаг даргын Тамгын газар, Онцгой байдлын газар болон Орхон аймаг дахь Улсын нөөцийн холбогдох мэргэжилтнүүд хамтран энэ оны ургацын урьдчилсан балансыг гаргажээ. Урьдчилсан балансаар 3753 га талбайгаас 9806 тонн үр тариа хураан авах төлөвтэй байна. Үүнээс 3643 га талбайн улаанбуудайгаас 9472 тонн ургац авах тооцоо гарчээ.
Түүнчлэн,
- 193 га талбайгаас 1808 тонн төмс,
- 409 га талбайгаас 5085 тонн хүнсний ногоо,
- 310 га талбайгаас 465 тонн малын тэжээлийн ургамал,
- 910 га талбайгаас 410 тонн тосны ургамал хураан авахаар урьдчилан тооцоолжээ.
Урьдчилсан тооцоог нэгж талбайд шилжүүлбэл үр тарианы дундаж ургац гектар тутамд 2.61 тонн, үүнээс улаанбуудайн ургац 2.60 тонн орчим байхаар байна. Харин төмсний ургац гектар тутамд 9.37 тонн, хүнсний ногоо 12.43 тонн орчим байх төлөвтэй байна.
Одоогоор эрт ургацын төмс, хүнсний ногооны хураалт эхэлж, шинэ ургацын бүтээгдэхүүнийг орон нутгийн зах зээлд нийлүүлж эхэлсэн байна. Бэлчээрийн ургац, даацын судалгаа нь мал сүргийн өвөлжилт, хаваржилтын бэлтгэлийг төлөвлөх, тухайн бүс нутгийн бэлчээрийн нөөц, ашиглалтыг тооцоход чухал үзүүлэлт болдог талаар албаныхан онцоллоо.
Эх сурвалж: Монцамэ агентлаг
