Говийн хөрсөнд ургуулсан 6 настай нэг модноос дунджаар 17 кг алим хураан авч байна.
УИХ-ын гишүүн О.Амгаланбаатарын санаачлан хэрэгжүүлж буй “Газар тариалан-Жимс, жимсгэнэ” хөтөлбөр үр дүнгээ өгч, говийн хөрсөнд жимс, жимсгэнэ тариалах боломжийг бодитоор харуулж буйг тариаланчид хэлж байлаа.
Говь-Алтай аймаг 2021 оноос “Газар тариалан-Жимс жимсгэнэ” хөтөлбөрийг боловсруулан цаг агаар , хөрсний онцлогийг судлан шинжилсний үндсэн дээр жимс тарьж ургуулах боломжтой сумдад хөтөлбөрөө хэрэгжүүлж эхэлсэн билээ.
Тэдгээрийн нэг нь Чандмань сум. Тус сумын цэцэрлэгийн хамт олон хүүхэд багачуудынхаа жимс жимсгэний хэрэгцээг хангахаар тарьж суулгасан 6 настай нэг модноос 17 кг алим хураан авч үр шимийг нь хүртэж буй аж.
Говь-Алтай аймаг “Газар тариалан-Жимс жимсгэнэ” хөтөлбөрийнхөө хүрээнд жимсний мод үржүүлгийн газрыг байгуулан үүнийгээ түшиглэн хөтөлбөрөө хэрэгжүүлж буй тухай ХХААГ-аас мэдээллээ.
Сонирхуулахад, Бигэр сумын Хөдөө аж ахуйн тасгийн хамт олон жимсний модны суулгац үржүүлгийн газрыг хариуцан аймгийнхаа сумдад нийлүүлэн ажилладаг нь ихээхэн онцлогтой юм. Тэрээр 2025 онд нийт 1500 орчим суулгац бэлтгэн нийлүүлсэн бол өнөө жил 1300 орчмыг бэлтгэжээ.
Зөвхөн алимны ургац бус, өрхийн аж ахуйг хөгжүүлэх, иргэд өөрсдийн хөдөлмөрөөр үр шимээ хүртэх, амьжиргаагаа дээшлүүлэх боломж нэмэгдэж буйн бодит жишээ юм.
Ил хөтөлбөрийн хүрээнд жимс жимсгэнэ, малын тэжээл, хүлэмжийн аж ахуй гэсэн гурван чиглэлд онцгой анхааран бодлогоор дэмжиж, орон нутгийнхаа хэрэгцээг хангах зорилгоор амжилттай хэрэгжүүлж байна.
Эх сурвалж: Монцамэ агентлаг
