Ховд аймгийн брэнд бүтээгдэхүүний нэг болох шинэ ургацын тарвас худалдаанд гараад хоёр сар болж байна.
Шинэ ургацын тарвас худалдаанд гарсан эхний үед нэг кг нь 5000 төгрөгийн үнэтэй байсан бол одоо ургац нэмэгдэж, үнэ буурчээ.
Ховд аймгийн төв захын гадна талбай болон авто зам дагуух худалдааны цэгүүдэд нэг кг тарвасыг одоогийн байдлаар 800-1000 төгрөгөөр борлуулж байна.
Зарим тариаланч Ховдын үржил шимт хөрсөнд тариалсан тарвасыг Улаанбаатар хот руу тээвэрлэж, ойролцоогоор нэг кг нь 2500-3500 төгрөгөөр худалдаж байгаа юм.
Ховд аймаг жилд дунджаар 5000 гаруй тонн тарвас хураан авдаг.
Энэ жилийн тухайд тариаланчид 500 гаруй га талбайд тарвас тариалсан ба ургац хураалтын ажил хэвийн үргэлжилж байна.
Эх сурвалж: Монцамэ агентлаг
