Хавар тариалангийн зарим бүс нутагт үргэжилсэн хур тунадас, нойтон цас орсны улмаас тариалалт долоо хоногоор хойшилсон байдаг.

Тэгвэл үүнтэй холбоотойгоор ургац хураах ажил өмнөх жилүүдтэй харьцуулах 10 орчим хоногоор хойшлох төлөв гарчээ. Ургац хураалтад 951 комбайн, 609 ширхэг жатка, 230 үтрэмд 1058 ширхэг үр тариа цэвэрлэх тоног төхөөрөмж, 453 ширхэг төмс, хүнсний ногоо хураах тоног төхөөрөмж ажиллах бөгөөд техник засварын ажил 82 хувьтай байгааг албаныхан хэллээ. Ургац хураахад ажиллах техникийн иж бүрдлээр тооцоход хураалтын ажлыг 26-30 хоногт багтаан дуусгах боломж бүрдсэн байна.

Ирэх есдүгээр сард агаарын дундаж температур ихэнх нутгаар олон жилийн дунджийн орчим байх боловч нутгийн баруун өмнөд хэсгээр дунджаас дулаан, төв болон зүүн аймгуудын зарим сумын нутгаар дунджаас сэрүүсэх төлөв гарсан. Есдүгээр сард өдөртөө харьцангуй дулаан байх боловч шөнөдөө агаарын температур огцом буурах, зарим үед уулархаг нутгаар нойтон цас орох, газар тариалангийн бүс нутгаар хяруу унах, хөрсөн дээр цочир хүйтрэх зэрэг үзэгдэл олон жилийн дундаж хугацаанаас харьцангуй эрт ажиглагдах магадлалтай байгааг цаг уурчид анхааруулж байна. Тиймээс малчид хадлан тэжээл бэлтгэх, малын хашаа хороо болон өвөлжилтийн бэлтгэлийг эртнээс хангах, тариаланчид ургац хураалтын ажлыг цаг агаарын нөхцөлтэй уялдуулан шуурхай зохион байгуулж, хяруу болон цочир хүйтрэлтээс ургацаа хамгаалах ажил хийх  шаардлагатайг анхаарууллаа.

Энэ жилийн хувьд ариалан эрхлэгч иргэд, аж ахуйн нэгжүүдээс ажиллах хүчний захиалга ирүүлсний дагуу Зэвсэгт хүчний нэгтгэл анги, Үндэсний батлан хамгаалахын их сургууль, Хөдөө аж ахуйн их сургуулийн 2800 цэргийн албан хаагч, сонсогч, оюутан, залуучуудыг ургац хураалтын ажилд оролцуулах аж. Өнөөдрийн байдлаар 115 цэргийн албан хаагч төмс, хүнсний ногооны ургац хураалтад ажиллаж байна. Цаашид ургац хураах ажилд Дотоод хэргийн их сургууль болон бусад их дээд сургууль, коллеж, МСҮТ-ийн оюутан, сурагчид, сонсогчид, Шүүхийн шийдвэр гүйцэтгэх ерөнхий газраас нэмэлтээр хүн, хүчийг татан оролцуулна.

Эх сурвалж: Монцамэ агентлаг