Дархан-Уул аймгийн хэмжээнд энэ оны ургацын урьдчилсан балансыг гаргаж, 13676 га талбайгаас нийт 18668 тонн ургац хураан авахаар тооцоолжээ.
Аймгийн хэмжээнд ургацын балансыг жил бүрийн наймдугаар сард гаргадаг бөгөөд энэ жилийн урьдчилсан тооцоог өнгөрсөн сарын сүүлийн 10 хоногт хийсэн байна. Нэг га талбайгаас дунджаар 13.7 центнер улаанбуудай хураан авах төлөвтэй байна.
Хураан авах улаанбуудайн 2100 тонныг ирэх оны тариалалтад ашиглах, 877 тонныг үрийн нөөцөд хадгалах, 1860 тонныг малын тэжээлд, 12909 тонныг гурилын үйлдвэрлэлд нийлүүлэхээр урьдчилан төлөвлөжээ.
Мөн 256 га талбайгаас 3251 тонн төмс буюу нэг га-гаас 142 центнер, 1845.8 га талбайгаас 27555 тонн хүнсний ногоо буюу нэг га-гаас 228 центнер ургац хураан авахаар тооцоолсон байна. Түүнчлэн 1515 га талбайгаас 455 тонн тосны ургамал буюу нэг га-гаас 3 центнер, 350 га талбайгаас 458 тонн малын тэжээл буюу нэг га-гаас 15 центнер ургац хураахаар төлөвлөсөн талаар аймгийн ХХААГ-аас мэдээлэв.
Эх сурвалж: Монцамэ агентлаг
