Засгийн газраас стратегийн нөөц улаан буудай бүрдүүлэхээр ХХААХҮЯ, “Хөдөө аж ахуйн корпорац” ТӨХХК-иас улаан буудайн үйлдвэрлэлийн өртөгт суурилсан худалдан авах үнийн тооцоог Монголын тариаланчдын үндэсний холбоонд танилцууллаа.

Тооцоог салбарын яам, ХААК ТӨХХК, мэргэжлийн холбоо хамтран 11 аймгийн 41 сумын 120 гаруй тариаланч, аж ахуйн нэгжийг хамруулсан өртгийн судалгааг хийжээ. ХААК-ийн танилцуулга, тариаланчдын холбооны саналыг үндэслэж, I ангиллын улаан буудай тонн тутмыг 1,450,000, хоёрдугаар ангиллынхыг 1,350,000, гуравдугаар ангиллынхыг 1,250,000, дөрөвдүгээр ангиллынхыг 1,150,000 төгрөгөөр худалдан авахаар тогтов.

Засгийн газраас дотоодын хэрэгцээг хангах, үнийн тогтвортой байдлыг хадгалах зорилгоор 100 мянган тонн хүнсний улаан буудайг өртөгт суурилсан, тариаланчдад ашигтай үнээр улсын стратегийн нөөцөд худалдаж авах шийдвэр гаргаж зардлыг 2026 төсвийн тодотголд өргөн мэдүүлснийг ХХААХҮЯ мэдээллээ.

ХХААХҮ хаврын тариалалтад шатах тослох материалыг хямд үнээр олгох, хөнгөлөлттэй зээлийн хэмжээг нэмж, хүртээмжийг нь сайжруулах, бордоо, үрийн хангамжийг дэмжих шийдвэрийг Засгийн газрын хуралдаанаас гаргуулсан. Монголын тариаланчдын үндэсний холбооны тэргүүн С.Батболд Засгийн газар энэ намар 100 мянган тонн буюу нийт хураах улаан буудайн гуравны нэгтэй тэнцэх хэмжээний стратегийн нөөц бүрдүүлэх болсон нь цаашид газар тариалангийн салбарт эргэлтийн хөрөнгө бий болох, аж ажуйн нэгжүүдээ дэмжих бодлого болсныг онцолсон юм.

Түүнчлэн сайд Ц.Идэрбат гурил үйлдвэрлэгч компаниудын төлөөлөлтэй уулзаж, стратегийн хүнс гурилын үнэ, улаанбуудайн хангамж, нийлүүлэлтийн талаар санал солилцлоо. Гурилын үйлдвэрүүд бүтээгдэхүүнийхээ үнэ нэмэхийг урьтал болгохгүй, үйлдвэрлэл, борлуулалтаа хэвийн явуулах боломжоор хангах, тухайлбал дотоодын зах зээлд ОХУ-ын импортын гурилыг оруулж ирэхгүй байхад анхаарах санал тавив. ХХААХҮЯ-наас гурилын импортын гэрчилгээ олгохыг зогсоогоод буйг дурдаж, үндэсний үйлдвэрлэгчдээ дэмжиж, хамтран ажиллана гэдгээ илэрхийлжээ.

Эх сурвалж: Монцамэ агентлаг