Өвөрхангай аймгийн хэмжээнд энэ онд 28.6 мянган тонн ургац хураан авах урьдчилсан тооцоо гаргажээ.

Тодруулбал, 9150 тонн үр тариа, 3200 тонн төмс, 2287 тонн хүнсний ногоо, 760 тонн тосны ургамал, 13175 тонн малын тэжээлийн ургамал тус тус хураан авахаар байгаа юм.

Өмнөх оныхтой харьцуулахад, улаан буудайн ургац 4000 тонноор буюу 55.1 хувиар, бусад үр тарианых 105 тонноор буюу 30 хувиар өсөх төлөвтэй байна. Түүнчлэн төмсний ургац 45 тонноор буюу 1.3 хувь, хүнсний ногоо 56 тонноор буюу 2.5 хувь, таримал тэжээлийн ургамал 630 тонноор буюу 4.7 хувиар тус тус нэмэгдэх тооцоо гарчээ. Харин тосны ургамлын ургац өмнөх оныхоос 480 тонноор буюу 61.2 хувиар буурах төлөвтэй байна.

Ингэснээр энэ онд орон нутгийн үйлдвэрлэлээр хэрэгцээт хүнсний улаанбуудайн 83.1 хувь, төмсний 77.5 хувь, хүнсний ногооны 25.6 хувийг тус тус хангах боломж бүрдэх юм.

Цаг агаарын нөхцөлөөс шалтгаалан ургац хураалтын ажил 7-10 хоногоор хойшлох магадлалтай байгааг аймгийн Хүнс, хөдөө аж ахуйн газраас мэдээлэв.

Ургац хураалттай холбогдуулан төмс, хүнсний ногооны 3397 тоннын багтаамж бүхий 107 зооринд ариутгал, агааржуулалт хийж байна.

Эх сурвалж: Монцамэ агентлаг