Монголын Жижиг, дунд үйлдвэрлэл, үйлчилгээний холбооны Ерөнхийлөгч Ч.Даваабаяр тэргүүтэй төлөөлөгчид 2026 оны есдүгээр сарын 03-ны өдөр БНХАУ-ын ӨМӨЗО-ны Эрээн хотод ажиллаж, Эрээн хотын Гадаад харилцааны алба болон Эдийн засгийн хамтын ажиллагааны бүсийн төлөөлөлтэй уулзлаа.

Уулзалтаар Монгол, Хятадын “Замын-Үүд–Эрээн эдийн засгийн хамтын ажиллагааны бүс”-ийн эрх зүйн орчин, бүтээн байгуулалтын явц, дэд бүтэц, логистик, худалдаа, хөрөнгө оруулалт болон цаашдын хөгжлийн чиглэлийн талаар мэдээлэл солилцож, хоёр улсын бизнес эрхлэгчдийн хамтын ажиллагааг бодит ажил хэрэг болгох боломжийн талаар санал солилцов.

Тус бүс нь Монгол, Хятадын худалдаа, эдийн засгийн харилцааг шинэ шатанд гаргах, хил дамнасан худалдаа, үйлдвэрлэл, тээвэр логистикийн уялдааг сайжруулах стратегийн ач холбогдолтой бүс юм. Монголын талын 900 га, БНХАУ-ын талын 903 га талбайг хамарсан уг бүсийг хөгжүүлснээр экспорт, импорт, үйлдвэрлэл, логистик, аялал жуулчлал зэрэг олон чиглэлээр хамтын ажиллагаа өргөжих боломжтой.

Уулзалтын үеэр Монголын жижиг, дунд үйлдвэрлэл эрхлэгчдэд БНХАУ-ын зах зээлд бүтээгдэхүүнээ нийлүүлэх, түнш байгууллагатай болох, хамтарсан үйлдвэрлэл байгуулах, хөрөнгө оруулалт татах, тээвэр логистикийн зардал болон хугацааг бууруулах боломжийг нэмэгдүүлэхэд эдийн засгийн хамтын ажиллагааны бүсийн гүйцэтгэх үүргийн талаар ярилцлаа.

Мөн хоёр улсын аж ахуйн нэгжүүдийн хоорондын шууд харилцааг нэмэгдүүлж, бизнесийн түншлэл, мэдээллийн солилцоог тогтмолжуулах, үйлдвэрлэл, худалдаа, үйлчилгээний чиглэлээр харилцан ашигтай төсөл, хөтөлбөр хэрэгжүүлэх шаардлагатайг талууд онцлов.

Монголын жижиг, дунд үйлдвэрлэгчдийн хувьд Эрээн хот нь БНХАУ-ын зах зээлд гарах гарц төдийгүй үйлдвэрлэлийн түүхий эд, тоног төхөөрөмж, технологийн эх үүсвэртэй холбогдох боломж бүхий худалдаа, логистикийн чухал төв юм. Иймд эдийн засгийн хамтын ажиллагааны бүсийн хөгжлийг эрчимжүүлэх нь зөвхөн хил орчмын худалдааг нэмэгдүүлэхээс гадна Монголын аж ахуйн нэгжүүдийн үйлдвэрлэлийн хүчин чадлыг нэмэгдүүлэх, экспортын бүтээгдэхүүний нэр төрлийг олшруулах, нэмүү өртөг шингэсэн бүтээгдэхүүн үйлдвэрлэх боломжийг дэмжих ач холбогдолтой.

Төлөөлөгчид мөн Замын-Үүд–Эрээн эдийн засгийн хамтын ажиллагааны бүсийн бүтээн байгуулалт, дэд бүтцийн өнөөгийн байдалтай газар дээр нь танилцаж, бүсийн хөгжлийг даган бий болох үйлдвэрлэл, худалдаа, үйлчилгээ, агуулах, тээвэр ложистикийн боломжийн талаар холбогдох төлөөлөлтэй санал солилцов.

Хоёр талын хамтын ажиллагааг зөвхөн төр, засгийн байгууллагын түвшинд бус, бизнес эрхлэгчид хоорондын шууд харилцаагаар өргөжүүлэх нь бүсийн эдийн засгийн үр өгөөжийг нэмэгдүүлэх чухал нөхцөл болохыг уулзалтаар онцоллоо. Түүнчлэн Монголын жижиг, дунд үйлдвэрлэл эрхлэгчдийг Эрээн хот болон цаашлаад БНХАУ-ын зах зээлтэй холбох, бүтээгдэхүүн үйлчилгээний танилцуулга, бизнес уулзалт, хөрөнгө оруулалтын арга хэмжээг тогтмол зохион байгуулах боломжийн талаар ярилцав.

Эдийн засгийн хамтын ажиллагааны бүсийн хөгжлийг эрчимжүүлэх хүрээнд хоёр талын холбогдох байгууллагууд хамтарсан төлөвлөлт, дэд бүтцийн уялдаа, хил холболт, хөрөнгө оруулалтын орчныг сайжруулах асуудлуудыг үе шаттайгаар хэрэгжүүлэхээр ажиллаж байна.

Ийнхүү Эрээн хотод хийсэн уулзалт нь Монголын жижиг, дунд үйлдвэрлэл эрхлэгчдийг БНХАУ-ын зах зээлтэй холбох, экспортын боломжийг нэмэгдүүлэх, хөрөнгө оруулалт, технологи, үйлдвэрлэлийн хамтын ажиллагааг өргөжүүлэхэд чиглэсэн бизнесийн харилцааг бэхжүүлэх ач холбогдолтой боллоо.

Цаашид Замын-Үүд–Эрээн эдийн засгийн хамтын ажиллагааны бүсийг түшиглэн хоёр улсын аж ахуйн нэгжүүдийн хамтарсан үйлдвэрлэл, худалдаа, логистик, хөрөнгө оруулалтын төслүүдийг нэмэгдүүлснээр хил орчмын худалдааг дан ганц бараа солилцооны түвшинд бус үйлдвэрлэл, экспорт, нэмүү өртөг шингэсэн эдийн засгийн хамтын ажиллагаа болгон өргөжүүлэх боломж бүрдэх юм.