Дархан-Уул аймагт ургац хураалт үргэлжилж, өнөөдрийн байдлаар үр тарианы 170 га, малын тэжээлийн 55 га, хүнсний ногооны 557 га талбайн ургацыг хураагаад байна.
Энэ жил аймгийн хэмжээнд 13 894 га-д үр тариа, 305 га-д малын тэжээл, 1845.8 га-д хүнсний ногоо тариалжээ. Үүнээс үр тарианы хураалт 1.22, малын тэжээлийнх 18.03, хүнсний ногооных 30.18 хувийн явцтай байна. Мөн нийт 17 789 га талбайд төмс, хүнсний ногоо тариалснаас 782 га-гийн ургацыг хурааж, хураалтын явц 4.40 хувьтай байна.
Одоогоор 38 иргэн, хоёр аж ахуйн нэгжийн талбайд 40 цэрэг, 458 ажил хайгч буюу нийт 498 хүн ургац хураалтад ажиллаж байна. ХХААГ-аас мэдээлснээр, 29 иргэний 452.7 га талбайд тариалсан таван төрлийн хүнсний ногооны ургацыг хураахад нийт 980 хүн шаардлагатай байгаа аж.
Эх сурвалж: Монцамэ агентлаг
