“Намрын ногоон өдрүүд-Сүхбаатарт үйлдвэрлэв 2026” үзэсгэлэн худалдаа хоёр өдөр үргэлжилж, үйлдвэрлэгчид нийт 145 сая төгрөгийн борлуулалт хийжээ. Бүсийн аймгуудын үйлдвэрлэл эрхлэгчид оролцсон нь энэ жилийн үзэсгэлэнгийн нэг онцлог болж, бүтээгдэхүүнээ сурталчлан борлуулахаас гадна туршлага солилцсон байна.
Малчид, жижиг, дунд үйлдвэрлэл эрхлэгчид, газар тариалан эрхлэгчид болон хувиараа хөдөлмөр эрхлэгчдийн бүтээгдэхүүний нэр төрөл нэмэгдэж, сав баглаа боодол, хаяг шошго, өнгө үзэмж өмнөх жилүүдийнхээс сайжирсан байна. Үүний зэрэгцээ бүтээгдэхүүний борлуулалт нэмэгдэж, шалгаруулалтад оролцогчдын чанар ахисныг зохион байгуулагчид онцоллоо.
Тухайлбал, Түвшинширээ сумын малчин Х.Эрдэнэчимэг үнээний болон ингэний сүүгээр цагаан идээ, эко хүнс үйлдвэрлэдэг. Түүний ингэний сүүгээр хийсэн бүтээгдэхүүн хэрэглэгчдэд танигдаж, жилийн дөрвөн улиралд захиалга авдаг болжээ. Энэ жилийн үзэсгэлэнд 80 гаруй нэр төрлийн бүтээгдэхүүнтэй оролцсон бөгөөд бүтээгдэхүүнээ эхний өдөр борлуулж дуусгасан байна.
Түмэнцогт сумын иргэн Д.Болормаа нутгийнхаа эмийн ургамлыг түүж, боловсруулан цай, эмийн ханд үйлдвэрлэж байна. Тэрээр энэ үйлдвэрлэлээ 18 жилийн турш эрхэлж, Сүхбаатар аймгаас гадна Дорнод аймаг, Багануур зэрэг газраас тогтмол захиалга авдаг болжээ.
Тэрээр ургамлаа түүхээс эхлээд боловсруулах, савлах хүртэлх бүх ажлыг гар аргаар хийдэг байна. Бүтээгдэхүүний савлагааг нэг загвараар захиалан хийлгэж, хаяг шошгыг өөрсдөө бэлтгэдэг болжээ. Энэ удаагийн үзэсгэлэнд цайны ханд нь хамгийн их борлуулалттай бүтээгдэхүүн болсон байна.
Үйлдвэрлэл эрхлэгчдийг 11 номинацаар шалгаруулснаас Баруун-Урт сумын ЗДТГ-ын газрын Хөдөө аж ахуйн тасаг шилдгийн шилдгээр, Түмэнцогт сумын ЗДТГ-ын Хөдөө аж ахуйн тасаг дэд байрт шалгарлаа.
Эх сурвалж: Монцамэ агентлаг
