Хөвсгөл аймгийн Эрдэнэбулган суманд малчдын сүү, цагаан идээг орон нутагт нь боловсруулж, бяслаг, сүүн бүтээгдэхүүн үйлдвэрлэх үйлдвэр ашиглалтад орууллаа.

Тус үйлдвэр дөрвөн төрлийн бяслаг, 10 гаруй төрлийн сүү, сүүн бүтээгдэхүүн үйлдвэрлэх хүчин чадалтай бөгөөд эрүүл ахуйн шаардлага хангасан орчин үеийн техник, тоног төхөөрөмжөөр тоногложээ.

Орон нутгийн малчдаас сүү худалдан авч, боловсруулан бяслаг, сүүн бүтээгдэхүүн үйлдвэрлэх бөгөөд ингэснээр малчид сүүгээ орон нутагт борлуулах боломжтой болж байна. Мөн сүүний борлуулалт нэмэгдэхийн зэрэгцээ шинээр ажлын байр бий болох юм.

Тус үйлдвэрийг ашиглалтад оруулснаар малчдын сүүний борлуулалтыг дэмжиж, өрхийн орлогод эерэг нөлөө үзүүлэхээс гадна орон нутагт үйлдвэрлэл хөгжихөд чухал ач холбогдолтой гэдгийг Эрдэнэбулган сумын Засаг дарга Б.Эрдэнэнаран хэллээ.

Хөвсгөл аймагт малын гаралтай түүхий эдийг орон нутагт нь боловсруулах, үйлдвэрлэлийг хөгжүүлэх зорилгоор 13 суманд бяслаг, сүү, цагаан идээний үйлдвэр байгуулахаар төлөвлөж 8 дахь үйлдвэр ашиглалтад орлоо.

Эх сурвалж: Монцамэ агентлаг