Говь-Алтай аймгийн Есөнбулаг сумын “Хүлэмжийн загвар агро парк”-т хүнсний ногоо тариалсан өрхүүд энэ жилийн ургацаа орон нутагт үйл ажиллагаа явуулж буй уул уурхайн компанид нийлүүлж эхэлжээ.
Тус сумын Засаг даргын 2024-2028 оны үйл ажиллагааны хөтөлбөр болон “Өсөлтийг өрх бүрд” хөтөлбөрийн хүрээнд өрхийн орлогыг нэмэгдүүлэх, үйлдвэрлэл эрхлэлтийг дэмжих, хүлэмжийн аж ахуйг хөгжүүлэх зорилгоор 6х40 метрийн хэмжээтэй дөрвөн хүлэмж байгуулжээ.
Уг хүлэмжүүдийг 2025 оноос иргэдэд хариуцуулан ажиллуулж, хүнсний ногоо тариалах арга технологийн сургалт, дадлагад хамруулжээ. Энэ онд хүлэмжүүдэд өргөст хэмх, улаан лооль, чинжүү, навчит болон бусад төрлийн хүнсний ногоо тариалсан байна.
Харин тариаланч өрхүүдийн бүтээгдэхүүнийг тогтвортой борлуулах нөхцөлийг бүрдүүлэх зорилгоор орон нутагт үйл ажиллагаа явуулж буй уул уурхайн компанитай гэрээ байгуулж, ургацыг нийлүүлж эхэлжээ.
Ингэснээр хүлэмжийн аж ахуй эрхэлж буй өрхүүд бүтээгдэхүүнээ борлуулах тогтмол зах зээлтэй болж, өрхийн орлогоо нэмэгдүүлэхийн зэрэгцээ орон нутгийн хүнсний ногооны үйлдвэрлэл, нийлүүлэлтийг нэмэгдүүлэх нөхцөл бүрдэж байна.
Эх сурвалж: Монцамэ агентлаг
