“Намрын өнгө” үзэсгэлэн худалдааны хоёр өдрийн хугацаанд оролцогчид 401.5 сая төгрөгийн борлуулалт хийсэн нь өнгөрсөн оныхоос 130.7 сая төгрөгөөр буюу 48.3 хувиар өсжээ.
Дундговь аймгийн ЗДТГ-аас орон нутгийн үйлдвэр, үйлчилгээ эрхлэгч, малчдын бүтээгдэхүүнийг хэрэглэгчдэд таниулах, борлуулалтыг дэмжих, шинэ түншлэл бий болгох зорилгоор зохион байгуулдаг тус үзэсгэлэн худалдаа энэ жил 22 дахь жилдээ боллоо.
Энэ жилийн үзэсгэлэн худалдаанд Дундговь аймгийн 15 сум, Дархан-Уул, Сэлэнгэ аймаг болон Улаанбаатар хотоос нийт 185 иргэн, аж ахуйн нэгж оролцож, жижиг, дунд үйлдвэрлэл, сүү, цагаан идээ, газар тариалан, тарьц суулгац, гар урлал, хоол үйлдвэрлэлийн бүтээгдэхүүнээ танилцууллаа.
Өнгөрсөн онд “Намрын өнгө” үзэсгэлэн худалдаагаар 270.8 сая төгрөгийн борлуулалт хийж байсан бол энэ жил борлуулалтын орлого 401.5 сая төгрөгт хүрчээ. Харин оролцогчдын тоо 275-аас 185 болж буурсан байна.
Өмнөх үзэсгэлэн худалдааны үеэр Дундговийн тариаланчдын ургуулсан хүнсний ногоог сургууль, цэцэрлэгийн хоол үйлдвэрлэлд нийлүүлэх зэрэг тогтмол борлуулалтын сувгийг бий болгох чиглэлээр ажиллажээ. Энэ нь үйлдвэрлэгчдэд үзэсгэлэн худалдаанаас гадна бүтээгдэхүүнээ тогтмол нийлүүлэх боломжийг бүрдүүлсэн байна.
Энэ жилийн үзэсгэлэн худалдаагаар сүү, цагаан идээний бүтээгдэхүүнээс ааруул, айраг эрэлт ихтэй байв. Тухайлбал, ааруул 1 кг-ыг нь 75 мянган төгрөгөөр борлуулж, эхний өдөр дууссан бол айраг литр нь 15 мянган төгрөгийн үнэтэй байв.
Мөн үзэсгэлэн худалдааны үеэр сүү, цагаан идээ, газар тариалан, аж үйлдвэрийн бүтээгдэхүүн, гар урлал, хоол үйлдвэрлэлийн чиглэлээр шилдэг оролцогчдыг шалгарууллаа.
Эрдэнэдалай сумын П.Гандолгор, Өндөршил сумын Ч.Хишигбаяр нар “Шилдэг сүү, сүүн бүтээгдэхүүн”, Адаацаг сумын Ж.Батсайхан “Сайхан айраг”, Сайнцагаан сумын Х.Базарчулуун, Баянжаргалан сумын “Ембүүт авдарын хишиг” хоршоо “Шилдэг газар тариалангийн бүтээгдэхүүн”, Дэрэн сумын “Алтан эмжээр” хоршоо “Шилдэг аж үйлдвэрийн бүтээгдэхүүн”, Сайнцагаан сумын Б.Дамдинцэрэн “Шилдэг гар урлалын бүтээгдэхүүн”, Сайнцагаан сумын “Үндрам цайр” ХХК “Шилдэг хоол үйлдвэрлэгч”-ээр тус тус шалгарлаа.
Харин Дэрэн, Цагаандэлгэр сумын Засаг даргын Тамгын газар “Шилдэг сум”-аар шалгарч, Сайнцагаан сумын Ч.Галбадрах “Шилдгийн шилдэг” буюу Засаг даргын нэрэмжит шагнал хүртэв. Шагналыг аймгийн ИТХ-ын дарга Ж.Мөнхчулуун, аймгийн Засаг даргын орлогч Ц.Хүрэлбаатар, ЗДТГ-ын Бүс, орон нутгийн хөрөнгө оруулалт, бодлого, төлөвлөлтийн хэлтсийн дарга О.Баярсайхан нар гардуулан өглөө.
Эх сурвалж: Монцамэ агентлаг
