Сэлэнгэ аймгийн тариаланчид 45.0 мянган га талбайгаас 82.2 мянган тонн улаанбуудай хураан авчээ. Есдүгээр сарын 25-ны байдлаар аймгийн хэмжээнд ургац хураалтын явц 30 хувьтай байна.
Энэ онд аймгийн хэмжээнд 123.0 мянган га талбайд улаан буудай тариалснаас 45.0 мянган га-наас ургац хурааж, нэг га-гаас дунджаар 18 центнер авчээ. Мөн 14,939 га талбайн улаан буудайг ангилан хадаад байгаа бөгөөд хураалтын явц 36.5 хувьтай байна.
Түүнчлэн 8.3 мянган га-д тариалсан бусад үр тарианаас 3.5 мянган га-г хурааж, 5.2 мянган тонн ургац авчээ. Харин 19.5 мянган га-д тариалсан тэжээлийн ургамлаас 2.3 мянган га-г хурааж, 9.0 мянган тонн тэжээл бэлтгэсэн бол 36.3 мянган га-д тариалсан тосны ургамлын 2.7 мянган га-гаас 1.9 мянган тонн ургац хураан авч, хураалтын явц 7.6 хувьтай байна.
Хүнсний гол нэрийн таримлын хураалт харьцангуй ахицтай байгаа бөгөөд 3.2 мянган га-д тариалсан төмсний 1,856 га-г хурааж, 27.0 мянган тонн ургац авсан нь 57.5 хувийн гүйцэтгэлтэй байна. Мөн 4.7 мянган га-д тариалсан хүнсний ногооны 2.1 мянган га-г хурааж, нэг га-гаас дунджаар 175 центнерийн ургац авч, 37.5 мянган тонн ногоо хураан авчээ.
Ийнхүү Сэлэнгэ аймгийн хэмжээнд ургац хураалтын ажил үргэлжилж байгаа бөгөөд тариаланчид үлдсэн талбайн ургацыг хугацаанд нь хураан авахад анхаарч байна.
Эх сурвалж: Монцамэ агентлаг
