“Хотонт” үржлийн хэсгийн хонийг үүлдэр болгон баталгаажуулах ажлыг Хотонт суманд зохион байгуулж байгаа талаар аймгийн Хүнс, хөдөө аж ахуйн газраас мэдээлж байна.

Энэ ажлын хүрээнд 9-р сарын 24-ний өдрийн байдлаар хээлтэгч 76 толгой, хээлтүүлэгч 40 толгой, нийт 116 толгой цөм сүргийн хониноос биологи, аж ахуйн ашигтай шинж тэмдэг болох илүү нугалам удамших зүй тогтол (геномын өвөрмөц тогтцын үзүүлэлт) -ын генетикийн шинжилгээг Хөдөө аж ахуйн их сургуулийн Генетикийн лабораторид хийлгэхээр цусны дээж авч, хүргүүлжээ.

Мөн “Хотонт” үржлийн хэсгийн цөм сүргийн хоньтой Хотонт сумын долоон өрхийг хамруулан хээлтэгч, хээлтүүлэгчийн намрын амьдын жин буюу тарга хүчний нэмэгдэл, хурганы өсөлт хөгжилтийг тодорхойлох ажлыг 100 толгой хуц, 70 толгой эм хонь, 100 толгой хурга, нийт 270 толгой хонинд хийж гүйцэтгээд байна.

Аймгийн Засаг даргын захирамжаар малын генетик нөөцийг хадгалах, хамгаалах, малын чанар үүлдэрлэг байдал, ашиг шимийг нэмэгдүүлэхээр “Хотонт үржлийн хэсгийн хонь”-ийг үүлдэр болгон баталгаажуулах ажлын хэсэг ийнхүү ажиллаж байна.

Өнгөрсөн жил энэ ажлын хүрээнд цөм сүрэг бүхий 20 өрх, хуцны 7 суурийг хамруулан хаврын ангилалтыг зохион байгуулж, анги чанарыг тогтоосон байдаг.

Архангай аймгийн Хотонт, Төв аймгийн Баянцагаан сумдад дагнан үржүүлэхээс гадна Архангай аймгийн Хашаат, Төв аймгийн Алтанбулаг, Сүхбаатар аймгийн Эрдэнэцагаан, Дорнод аймгийн Сэргэлэн, Хөлөнбуйр, Дундговь аймгийн Эрдэнэдалай, Хөвсгөл аймгийн Ренчинлхүмбэ, Цагаан-Уул сумдад тусгай суурь сүрэг бүрдүүлэн үржүүлж иржээ.

Хотонт үржлийн хэсгийн хонины цөм сүргийг Архангай аймгийн Хотонт суманд үржүүлдэг. “Хотонт” үржлийн хэсгийн хониноос мах-өөх-бүдүүн ноосны чиглэлээр ашиг шимийг хүртэх юм.

Эх сурвалж: Монцамэ агентлаг