Булган аймагт энэ оны ургац хураалтын явц өмнөх оны мөн үеийнхээс ахицтай байна. Тухайлбал, улаан буудайн тариалсан талбай 7.8 мянган га-аар нэмэгдэж, нэгжийн ургац 3.9 цн/га-аар өсжээ.
Булган аймгийн Хүнс, хөдөө аж ахуйн газрын мэдээллээр энэ онд улаан буудайг 38.649 га-д тариалснаас одоогоор 18.524 га-гийн ургацыг хураан авч, явц 47.9 хувьд хүрээд байна. Нэгжийн ургац 15.5 цн/га байгаа нь өнгөрсөн оны мөн үеийнхээс 3.9 цн/га-аар нэмэгдсэн үзүүлэлт юм.
Өнгөрсөн онд тус аймагт улаан буудайг 30.828 га-д тариалж, 14.698 га-гаас ургац хураан авсан бөгөөд хураалтын явц 47.6 хувьтай байжээ. Нэгжийн ургац 11.6 цн/га байсан байна.
Төмсний тариалалтын талбай мөн нэмэгджээ. Өнгөрсөн онд 350.6 га-д төмс тариалсан бол энэ онд 469.3 га-д тариалж, 118.7 га-гаар нэмэгдүүлсэн байна. Одоогоор 212.4 га буюу нийт талбайн 45.3 хувийн ургацыг хураан авчээ.
Энэ оны ургац хураалтын эхний үзүүлэлтээр улаан буудайн тариалалтын талбай, хураасан талбай болон нэгжийн ургац өмнөх оны мөн үеийнхээс өссөн байна.
Өнгөрсөн онд цаг агаарын хэт халалт, хур тунадас бага байснаас ургац хураалтад сөргөөр нөлөөлсөн бол энэ онд Булган аймгийн тариаланчид тариалалтын талбайгаа нэмэгдүүлж, нэгжийн ургацаа өсгөжээ.
Эх сурвалж: Монцамэ агентлаг
