Монголын тавилга үйлдвэрлэлийн салбарт 25 жилийн туршлагатай Kitchen ALL брэнд өнөөдөр /10.30/ шинэ шоурумынхаа нээлтийг хийж, ойн баяраа тэмдэглэлээ.
Нээлтийн үйл ажиллагаанд Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр оролцож, үндэсний үйлдвэрлэгчдийн хөгжил, дотоодын үйлдвэрлэлийн ач холбогдлын талаар байр сууриа илэрхийлэв. Мөн Монголын Жижиг, дунд үйлдвэрлэл, үйлчилгээний холбооны хамт олон хүрэлцэн очиж, баяр хүргэн амжилт хүссэн юм.
Анх “Модем” нэрээр үйл ажиллагаагаа эхлүүлсэн тус компанийн үйлдвэрлэлийн хөгжил “Долоон болдог” ХХК-ийн түүхтэй салшгүй холбоотой. Үйлдвэрлэлийн хүчин чадал, технологи, бүтээгдэхүүний нэр төрлөө үе шаттайгаар өргөжүүлсээр өнөөдөр гал тогооны тавилгаас гадна зочны, унтлагын болон хүүхдийн өрөө, угаалгын өрөө, оффисын тавилга, чулуун хийц зэрэг олон төрлийн бүтээгдэхүүн үйлдвэрлэж байна.
Компанийн хөгжлийн нэг чухал үе шат нь 10,000 ам метр талбай бүхий үйлдвэрийн цогцолбор, орчин үеийн тоног төхөөрөмжид тулгуурласан үйлдвэрлэлийн тогтолцоог бүрдүүлсэн явдал юм. Компьютерын удирдлагатай тоног төхөөрөмж, автоматжуулсан будгийн шугам, мэргэжлийн зураг төсөл, үйлдвэрлэлийн программ хангамжийг ашигласнаар бүтээгдэхүүний нарийвчлал, чанар, загварын сонголтыг сайжруулах боломж бүрджээ. Мөн ISO 9001:2015 чанарын менежментийн стандартыг үйл ажиллагаандаа нэвтрүүлж, үйлдвэрлэл, үйлчилгээний чанарыг тасралтгүй сайжруулахад анхаарч байна.
Шинэ шоурумд хэрэглэгчид гал тогоо болон гэр ахуйн тавилгын төрөл бүрийн загвар, материал, өнгө, хийцийн сонголттой танилцаж, өөрийн орон зай, хэрэгцээнд тохирсон захиалгат шийдэл авах боломжтой. Тавилгын хавтан, тоноглол, байгалийн чулуун хийц, гадаргуугийн боловсруулалт, будаг өнгөлгөө зэрэг шийдлийг нэг дороос сонгох боломж бүрдүүлсэн нь шоурумын онцлог юм.
Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр:
“Үндэсний үйлдвэрлэгчдийн хөгжил бол улс орны эдийн засгийн бие даасан байдал, ажлын байр, өрхийн орлогыг нэмэгдүүлэхэд чухал нөлөөтэй. Kitchen ALL брэндийн 25 жилийн хөдөлмөр, үйлдвэрлэлээ технологийн шинэчлэлээр хөгжүүлж ирсэн туршлага нь Монголын үйлдвэрлэгчид дотоодын зах зээлд төдийгүй олон улсын жишигт нийцсэн бүтээгдэхүүн үйлдвэрлэх боломжтойг харуулж байна. Цаашид үндэсний үйлдвэрлэлээ дэмжиж, чанар, бүтээмж, өрсөлдөх чадвараа нэмэгдүүлэх нь чухал юм.”
“Долоон болдог” ХХК-ийн Захирал С.Оюун:
“Бид 25 жилийн хугацаанд хэрэглэгчдийнхээ итгэлийг дааж, үйлдвэрлэлийн технологи, бүтээгдэхүүний чанар, загварын сонголтоо үе шаттайгаар хөгжүүлж ирлээ. Шинэ шоурум бол хэрэглэгчдэдээ илүү ойр байж, хэрэгцээнд нь нийцсэн шийдлийг санал болгох дараагийн алхам юм. Цаашид ч бид мэдлэг, технологи, хүний нөөцдөө хөрөнгө оруулж, үндэсний үйлдвэрлэлээ улам хөгжүүлэн, эх орныхоо хөгжилд бодит хувь нэмэр оруулахын төлөө хичээн ажиллах болно.”
Kitchen ALL брэндийн шинэ шоурум Улаанбаатар хотын “Тавилга плаза” төвийн хоёр, гуравдугаар давхарт байрлаж байна. Тус брэндийн 25 жилийн ой, шинэ шоурумын нээлт нь үндэсний үйлдвэрлэгчийн хуримтлуулсан туршлага, технологийн шинэчлэл, хэрэглэгчдэд хүргэх үйлчилгээний хөгжлийг нэг дор харуулсан үйл явдал боллоо.
