Евразийн эдийн засгийн комиссын удирдах зөвлөлийн дарга Михаил Мясникович “Үндэсний мөнгөн тэмдэгтээр хийх харилцан төлбөр тооцооны хувь хэмжээг нэмэгдүүлэх нь Евразийн эдийн засгийн холбоо /ЕАЭЗХ/ болон ШХАБ-ын хувьд хамгийн ирээдүйтэй чиглэл юм” гэж хэлэв.
Самарканд хотноо болох ШХАБ-ын дээд хэмжээний уулзалтаар гадаад худалдааны төлбөр тооцоог үндэсний мөнгөн тэмдэгтээр хийх хувь хэмжээг нэмэгдүүлэх замын зураглалд гарын үсэг зурахаар төлөвлөжээ. ЕАЭЗХ-ны гишүүн орнууд энэ талаар туршлага сайтай. “ЕАЭЗХ байгуулагдсанаас хойших долоон жилийн хугацаанд харилцан тооцоонд үндэсний мөнгөн тэмдэгтийн эзлэх хувь 74%-иас давсан, тус холбооны орнууд үндэсний мөнгөн тэмдэгтийг харилцан худалдаанд төлбөр тооцоо хийхдээ ашиглах боломж бий” гэж Михаил Мясникович “Известия” сонинд өгсөн ярилцлагадаа мэдэгдэв.
Түүний хэлснээр Евразийн бүс нутгийн тээвэр логистикийн төслүүдийн уялдааг сайжруулах, дэд бүтцийг хөгжүүлэх, хамтарсан үйл ажиллагаа нь хамгийн ирээдүйтэй хоёр дахь чухал алхам болох юм. ШХАБ-ын дээд хэмжээний уулзалтаар харилцан уялдаатай, эдийн засгийн үр ашигтай тээврийн коридорыг хөгжүүлэх стратегийн баримт бичгийг хэлэлцэхээр төлөвлөж байна. Тээврийн шинэ коридор бий болгох саналууд, хамтран хэрэгжүүлэгч байгууллагуудын стратегийн баримт бичигт тодорхойлсон зорилго, зорилтууд нь ЕАЭЗХ-ны стратегийн баримт бичигтэй бүрэн нийцэж байгааг тэрээр онцлов.
ШХАБ-ын дээд хэмжээний уулзалт 9 дүгээр сарын 15-16-ны өдрүүдэд Самарканд хотод болж байна. Одоогоор тус байгууллагад ОХУ, Энэтхэг, Казахстан, Киргизстан, Хятад, Пакистан, Тажикистан, Узбекистан улсууд гишүүн бөгөөд ажиглагч орнууд – Афганистан, Беларусь, Иран, Монгол, түнш орнууд – Азербайжан, Армен, Камбож, Балба, Турк, Шри Ланка юм.
