Чехийн Засгийн газар хэрэглээний түвшин багад тооцогддог хэрэглэгчдийн эрчим хүч болон байгалийн хийн үнэд дээд хязгаар тогтоожээ.
Цахилгааны төлбөр нэг киловатт тутамд 6 крон, байгалийн хий 3 крон байх бөгөөд 11 дүгээр сараас мөрдөж эхлэхээр төлөвлөсөн байна. Тус хөтөлбөрт улсын төсвөөс 14.5 тэрбум ам. доллар төсөвлөжээ. Засгийн газрын эрчим хүч болон байгалийн хийн үнэд дээд хязгаар тогтоох саналыг Сенатын танхим 9 дүгээр сарын 13-ны өдрийн хуралдаанаар дэмжсэн бөгөөд саналыг Парламентын доод танхим 9 дүгээр сарын 16-ны өдрийн хуралдаанаар дахин хэлэлцэж, дэмжсэн нөхцөлд Сенат 9 дүгээр сарын 20-ны өдрийн хуралдаанаар дахин хэлэлцэх аж.
Улмаар Польшийн байгалийн хийн системтэй холбогдох “Сторк II” байгалийн хийн хоолой, Германд шингэрүүлсэн байгалийн хийн шугам барих асуудлыг Засгийн газар хэлэлцэж хэрэгжүүлэхийг Сенатаас зөвлөсөн байна.
Томоохон бизнес эрхлэгчдийн тухайд Засгийн газраас нөхөн олговор олгох саналыг Аж үйлдвэр, худалдааны сайд Й.Сикела дэвшүүлсэн бөгөөд нийт 1.3 тэрбум ам. долларын тусламжийг 8000 орчим компанид үзүүлнэ гэж үзжээ. Европын хууль тогтоомжийн дагуу бизнесийн салбарт эрчим хүчний үнийн дээд хязгаар тогтоох боломжгүй тул нөхөн олговор хэлбэрээр олгох аж. Үйлдвэрлэл болон уул уурхай зэрэг чиглэлээр үйл ажиллагаа эрхэлдэг аж ахуйн нэгжүүдэд нөхөн олговор олгох сонирхолтой байгаа бөгөөд энэ оноос эхлэн хүсэлт гаргах боломжтой гэв.
