UNIDO
2022 оны 10-р сарын 27-нд НҮБ-ын Аж үйлдвэр хөгжлийн байгууллагын хөтөлбөрийн зохицуулагч ЕТГ- Хүнсний төсөл, хөтөлбөр хариуцсан албанд хүрэлцэн ирж санал солилцлоо.
ЮНИДО-ын Монгол Улс дахь статус өргөжих боломж бүрдэж байна. Одоо ЮНИДО-ын Монгол Улс дахь үйл ажиллагааг БНХАУ-ын Бээжин хот дахь тус байгууллагын БНХАУ, БНАСАУ, Монгол Улсыг хавсарсан суурийн төлөөлөгч, бүс нутгийн төлөөлөгчийн газрын даргын удирдлагад Монгол дахь ЮНИДО-ын хөтөлбөрийн зохицуулагч хариуцан ажиллаж байна. Техник туслалцааны төсөл, хөтөлбөрүүдийг тус байгууллага Вена хот дахь Төв штабаас шууд удирдаж ажилладаг.
ЮНИДО нь олон улсын технологи дамжуулах замаар инновацын төслүүд хэрэгжүүлэхээр ажиллаж байна. Мөн ХХААХҮЯ-тай байгуулсан “Стратегийн хамтын ажиллагааны 2021-2025” баримт бичгийн хэрэгжилтийг хангахаар ажиллаж байна.
Цаашид ЮНИДО нь эко аж үйлдвэрийн паркийн сайн туршлага нэвтрүүлэх, аж үйлдвэрийн салбарын ажиллах хүчний ур чадварыг нэмэгдүүлэх, хүнсний үйлдвэрлэлийн салбарт итгэмжлэл, тохирлын үнэлгээ, лабораторийн сорил шинжилгээний үйлчилгээг хөгжүүлэх, хүнсний аюулгүй байдлын менежментийн тогтолцоо, сав баглаа боодол, шошгожуулалтын стандартыг нэвтрүүлэх, эдийн засгийг төрөлжүүлэхэд Монгол Улсын нөхцөл байдалд тохирсон агро аж үйлдвэрийн паркийн төлөвлөлт хийх зэргээр үйл ажиллагаагаа тэлж ажиллах боломжтой байна.
