Түншүүд ба донор байгууллагууд: Байгаль орчин, аялал жуулчлалын яам; Хүнс, хөдөө аж ахуй, хөнгөн үйлдвэрийн яам; Европын холбоо; Германы олон улсын хамтын ажиллагааны нийгэмлэг
Хэрэгжих хугацаа: 2021 – 2024
Төслийн зорилго: ХАА-н бүтээмж, тогтвортой байдлыг хангах, нэмүү өртгийн сүлжээг хөгжүүлэх зорилгоор уур амьсгалын өөрчөлтөд дасан зохицсон, ландшафтын түвшний шинэлэг арга зарчмуудыг нэвтрүүлэх
Байршил: Сэлэнгэ аймгийн Жавхлант, Ерөө, Мандал сум; Хэнтий аймгийн Баян-Адарга, Өмнөдэлгэр, Биндэр сум
СТРИЙМ төсөл нь ЕХ-ны Даян дэлхийн уур амьсгалын өөрчлөлтийн холбоо+ (ДДУАӨХ)-ны хэрэгжүүлж буй хүнсний тогтолцоо ба нэмүү өртгийн тогтвортой сүлжээ бий болгох зорилготой уур амьсгалын өөрчлөлтийг сааруулах, түүнд дасан зохицох санаачилга ба Хөдөө аж ахуйн судалгаа хийх замаар ухаалаг инновацыг хөгжүүлэх (ХААСХЗУИХ) хамтарсан санаачилгын нэг бүрдэл хэсэг юм. Тус төсөл нь Монгол Улсын “Үндэсний хэмжээнд тодорхойлсон хувь нэмэр” (ҮХЦ)-ын хэрэгжилтэд хувь нэмэр оруулах, хөдөө аж ахуйн салбарын нөлөөллийг бууруулах, дасан зохицох арга хэмжээг хэрэгжүүлэхэд дэмжлэг үзүүлнэ.
Төслийн үндэслэл
Дэлхийн уур амьсгалын өөрчлөлтийн нөлөө Монгол улсад эрчимтэй ажиглагдаж, агаарын температурын өсөлт, хур тунадасны өөрчлөлтөөр илэрч байна. Сүүлийн 70 гаруй жилийн хугацаанд агаарын дундаж температур 2.2°С орчим нэмэгдэж, хур тунадасны хэмжээ мэдэгдэхүйц буурсан байна. Түүнчлэн, сүүлийн хэдэн арван жилд байгаль, цаг уурын аюултай болон гамшигт үзэгдлүүдийн тохиолдлын тоо, давтамж ихсэж байгаа нь уур амьсгалын өөрчлөлтөөс шууд улбаатай юм. Эдгээрээс гадна, улсын хэмжээнд газар ашиглалт, төлөвлөлтийн талаарх цогц бодлого харьцангуй сул байгаагаас газрын доройтол, цөлжилт эрчимжих, хөдөө орон нутгаас суурин газар руу шилжих хөдөлгөөн нэмэгдэх зэрэг экологи, нийгэм, эдийн засгийн олон талт хүндрэл, бэрхшээлүүд үүссэн. Цөлжилт, газрын доройтол нь экосистемийн чадавхыг аажмаар бууруулж, хөдөө аж ахуйн салбарын бүтээмжит чанар, хүнсний аюулгүй байдалд сөргөөр нөлөөлж байна.
Үйл ажиллагаа
Төслийн үйл ажиллагаа ландшафтын түвшний шинэлэг, тогтвортой менежментийн арга, зарчмуудыг нэвтрүүлэх замаар газар ашиглалтын нэгдсэн төлөвлөлтийг сайжруулах, байгалийн нөөцийг зохистой хамгаалахад чиглэгдэнэ. Уур амьсгалын өөрчлөлтөд дасан зохицсон агро экологийн өртгийн сүлжээг дэмжих, хүнсний аюулгүй байдлыг сайжруулах, үндэсний хэмжээнд судалгаа, шинжилгээний чадавхийг бэхжүүлэх замаар хөдөө аж ахуйн өртгийн сүлжээн дэх инновацийг дэмжих, бодлого, хөрөнгө оруулалтын сайн туршлагыг түгээн дэлгэрүүлэхийг зорьж байна.
- Зорилтот сумдын нутаг дэвсгэрийн хөгжлийн төлөвлөгөөг боловсруулах, Монгол улсын газар зохион байгуулалтын ерөнхий төлөвлөгөөд нийцүүлэн аймгийн түвшний газар ашиглалтын төлөвлөгөөг боловсруулах буюу шинэчлэх, газар ашиглалтын зураглал, холбогдох судалгааны ажлуудыг гүйцэтгэх
- Агроэкологийн туршлагыг түгээн дэлгэрүүлэх чиглэлээр эрдэм шинжилгээний байгууллагууд, үйлдвэрлэгчдийн чадавхыг сайжруулах
- Уур амьсгалын өөрчлөлтөд дасан зохицсон хүнс үйлдвэрлэлийн тогтолцоог бэхжүүлэх зорилгоор агроэкологийн өртгийн сүлжээг хөгжүүлэх
- Уур амьсгалын өөрчлөлтийн өнөөгийн нөхцөлд хөдөө аж ахуй, ойн үйлдвэрлэлийг экосистемийн үйлчилгээг харгалзан хөгжүүлэх. Тус зорилтын хүрээнд хамгаалалтын зурвас, салхины хамгаалалт, ой, бэлчээрийн цогц системийг загвар байдлаар байгуулах
