Хятад улсын Худалдааны яамнаас 2023 оны 8 дугаар сарын 18-ны өдөр хэвлэлийн бага хурал зохион байгуулж, “4 дэх удаагийн Монгол-Хятадын экспо”-г зохион байгуулах гэж буй талаар зарлав. Уг хэвлэлийн бага хуралд Хятад улсын Худалдааны яамны дэд сайд Ли Фэй, Монгол Улсын Хүнс, хөдөө аж ахуй, хөнгөн үйлдвэрийн дэд сайд М.Ганхүлэг, ӨМӨЗО-ы дэд тэргүүлэгч Ян Жин нар оролцож, “4 дэх удаагийн Монгол-Хятадын экспо”-гийн бэлтгэл ажлын талаар танилцуулж, сэтгүүлчдийн сонирхсон асуултад хариулав.
Хятад улсын Худалдааны яамны дэд сайд Ли Фэй хэлэхдээ, “сүүлийн жилүүдэд хоёр талын эдийн засаг, худалдааны хамтын ажиллагаа бодит үр дүнд хүрч, иж бүрэн стратегийн түншлэлийн харилцаа тасралтгүй гүнзгийрсээр байна. Энэ нь нэгд, хоёр талын худалдааны цар хүрээ улам өргөжиж байгаа; хоёрт, худалдааны бүтэц өдрөөс өдөрт сайжирч байгаа; гуравт, Хятад улсаас Монгол Улсад оруулах хөрөнгө оруулалт нэмэгдэж байгаа; дөрөвт, эдийн засаг, технологийн хамтын ажиллагаа гүнзгийрсээр байгаагаар илэрхийлэгдэж буйг” цохон тэмдэглээд, “Худалдааны яамны нэрийн өмнөөс гадаад, дотоодын төлөөллийг энэ удаагийн Монгол-Хятадын экспод оролцохыг чин сэтгэлээсээ урьж байна. Бид бүх талуудтай нягт хамтран ажиллаж, энэхүү экспог хамтран зохион байгуулж, бүс нутгийн хамтын ажиллагааг хөгжүүлэхийн тулд бүх талаар хамтран ажиллана” гэв.
Монгол Улсын Хүнс, хөдөө аж ахуй, хөнгөн үйлдвэрийн дэд сайд М.Ганхүлэг хэлэхдээ, “Монгол Улсын Засгийн газар энэхүү экспод өндөр ач холбогдол өгч байгаа бөгөөд өмнөх гурван удаагийн экспо ч амжилттай зохион байгуулагдсаныг дурдах нь зүйтэй. Сүүлийн жилүүдэд бид Монгол Улс ба Хятад улс, ялангуяа Монгол Улс, ӨМӨЗО-ы эдийн засаг, худалдаа, соёл, иргэдийн солилцоо зэрэг олон салбарын хүрээнд хамтын ажиллагааг ахиулахад ихээхэн амжилт гаргасан” гэж онцоллоо.
Мөн тэрээр Монгол Улсын Засгийн газрын зүгээс авч хэрэгжүүлж буй арга хэмжээ болон хөрөнгө оруулалтыг татах зорилгоор өргөн баригдсан шинэ хуулийн төсөл, Монгол Улсын Ерөнхийлөгчийн санаачилсан “Хүнсний аюулгүй байдал, “Тэр бум мод” хөдөлгөөн, аялал жуулчлалыг хөгжүүлэх чиглэлээр “Монголд зочлох жил” зэрэг өргөн хүрээний асуудлаар мэдээлэл өглөө.
ӨМӨЗО-ы дэд тэргүүлэгч Ян Жин хэвлэлийн бага хурлын үеэр “Энэ удаагийн экспо нь “Хөгжлийн шинэ боломжуудыг нээн хуваалцаж, шинэ хэв маягийг бий болгох нь” гэсэн уриан дор зохион байгуулагдаж байгаа ба найрсаг, чин сэтгэл, харилцан ашигтай, хамтдаа хожих зарчмыг баримталж, эдийн засаг, худалдааны үндэсний эдийн засаг, худалдааны үзэсгэлэнгийн нээлтийн ёслолыг зохион байгуулахаар төлөвлөж байна. Яармаг, хурал, форум, үзэсгэлэн, соёлын солилцоо зэрэг таван том салбарын цуврал арга хэмжээг зохион байгуулж, хоёр улсын болон дэлхийн улс орнуудтай бодит хамтын ажиллагааг гүнзгийрүүлж, улс орнуудын эдийн засгийн хөгжил, хамтын ажиллагаанд тус дөхөм үзүүлэх болно” гэж хэллээ.
