Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр ХХААХҮЯ-ны Бодлого, төлөвлөлтийн газрын дарга Ц.Болорчулуун, Нийслэлийн Хүнс, хөдөө аж ахуйн газрын дарга Х.Эрдэнэбилэг нар “МБҮ Трейд” ХХК-ийн хэрэгжүүлж буй мал мах худалдаалах төвлөрсөн зах, мал нядалж бэлтгэх үйлдвэрийн барилгын үйл явцтай танилцлаа.
Нийслэлийн баруун, зүүн талд баригдаж буй энэхүү төсөл ашиглалтад орсноор 1500 ажлын байр шинээр бий болж, хэрэглэгчид шинэ, эрүүл махыг өөрсдөө сонгож авах, малчид худалдаа, үйлчилгээг нэг дороос авах, нийслэл Улаанбаатар хотод амьдарч буй 1,6 сая хүний хүнсний хэрэгцээг шийдэх боломж бүрдэнэ.
2015 онд анх төслийн үйл ажиллагаа эхэлсэн ч цар тахал дэгдсэн хоёр жилийн хугацаанд гацалтад орж, цаг алджээ. Одоогоор бүтээн байгуулалтын ажил 50 хувийн гүйцэтгэлтэй явж байна.
Монгол Улсын Ерөнхийлөгчийн санаачилсан “Хүнсний хангамж, аюулгүй байдал” үндэсний хөдөлгөөний хүрээнд ард түмнээ эрүүл, аюулгүй хүнсээр хангах зорилгыг дэмжиж, олон улсын стандартын шаардлага хангасан, нядлах, хадгалах, тээвэрлэх технологийг нэвтрүүлж ажиллаж байгаагаа “МБҮ Трейд” ХХК-ийн Захирал С.Бямбасүрэн хэлж байв.
Өдөрт 7500 бог, 1800 бод нядлах 8 хос бүрэн автомат нядалгааны шугам, 11,0 мянган тонн сэврээх гүн хөлдөөх, хадгалах, хөргүүр, малыг сорил, шинжилгээнд оруулах иж бүрэн 7 лаборатори, 2 талд нийт 935 машины авто зогсоол, 16,000-19,000 толгой мал хаших малын саравч, хашаа зэргийг цогцоор барьж гүйцэтгэхээр уг төслийг хэрэгжүүлж, Нийслэлийн хүн амыг эрүүл, аюулгүй орчинд бэлтгэгдсэн, стандартын шаардлагад бүрэн нийцсэн махаар хангах, шинээр 1000 орчим хүнийг ажлын байраар хангах зорилготой.
Үйлдвэрийн хүчин чадлыг ажлын 8 цагаар тооцоход 1 жилд нядалгааны жингээр 172,500 тонн мах бэлтгэх боломжтой бөгөөд нэмэлтээр 100 машин бүхий хүргэлтийн авто бааз, цэвэрлэх байгууламж, шилмэл омог, үйлдрийн мал, эцэг мал худалдаалах малын бирж буюу олон улсын жишигт нийцсэн малын дуудлага худалдаа явуулах газрыг төлөвлөөд байна.
Тус төсөл нь хотын баруун, зүүн 2 байршил дээр тус бүр Монголчуудын уламжлалт ахуй, заншилтай холбоотой өөрийн биеэр малыг сонгон худалдан авч хүнсэнд хэрэглэх хэрэгцээнд тулгуурласан “Амьд мал худалдаалах малын зах”, “Мал нядлах, мах бэлтгэх үйлдвэр” гэсэн үндсэн 2 хэсэг, нийт 4 үйлдвэрийн цогцолбор байдлаар шийдсэн.
Сонгинохайрхан дүүрэг 32-р хороонд байрлах төслийн хувьд:
Шилмэл малын бирж буюу дуудлага худалдаа явуулах газар, 650 машины авто зогсоол, цэвэрлэх байгууламж, 12000-13000 толгой мал хаших саравч, мах бэлтгэлийн хүчин чадлын хувьд малын захын цехэд өдөртөө 100-200 бод, 1000 бог бэлтгэх, үйлдвэртээ өдөрт 800 бод, 3500 бог бэлтгэх, нийт 1000 бод, 4500 бог бэлтгэх бүрэн автомат нядалгааны 4 хос шугам, малыг урьдчилсан үзлэг тест хийх, нарийн шинжилгээ авах лабораторийн байр тус тус төлөвлөгдсөн.
Баянзүрх дүүрэг 11-р хороонд байрлах төслийн хувьд:
285 машины авто зогсоол, 4500-5000 орчим толгой мал хаших саравч, мах бэлтгэлийн хүчин чадлын хувьд малын захын цехэд өдөртөө 100-200 бод, 1000 бог бэлтгэх, үйлдвэртээ өдөрт 300 бод, 2500 бог бэлтгэх, нийт 500 бод, 2000 бог бэлтгэх бүрэн автомат нядалгааны 4 хос шугам, малыг урьдчилсан үзлэг тест хийх, нарийн шинжилгээ авах лабораторийн байр тус тус төлөвлөгдсөн.
