Монгол Улсын мах, махан бүтээгдэхүүний ууган үйлдвэр үйл ажиллагаагаа өргөжүүлж, дэлхийн жишигт нийцэх шинэ үйлдвэртэй боллоо.
77 жилийн түүхт Монгол улсын хүнсний ууган үйлдвэр “Мах Импекс” ХК 2023 онд үйлдвэрлэлийнхээ чанар, стандартыг өргөжүүлж, дэлхийн жишигт нийцсэн цоо шинэ үйлдвэрээ ашиглалтад оруулжээ.
Тус компани Австри улсын BERTSCH-Laska групп компанитай хамтран төсөл хэрэгжүүлж BERTSCH-Laska компаниас шинэ үйлдвэрийн түлхүүрээ гардан авав.
Орчин үеийн тоног төхөөрөмж төдийгүй шинэ жишиг нэвтрүүлсэн уг үйлдвэр нь Ази тивд нээгдсэн өндөр стандартын 4 дэх үйлдвэр болж байна. Тус шинэ үйлдвэр нь хоногт 50 тонн бүтээгдэхүүн буюу бух төрлийн хиам, зайдас, салями, хагас боловсруулсан, утлагат болон хөлдөөсөн бүтээгдэхүүн (банш, бууз, пицца, ази бэлэн хоол гэх мэт) үйлдвэрлэх хүчин чадалтай төдийгүй түүхий утлагат салями, беконыг шарах төхөөрөмжийг Монголд анхлан үйлдвэрлэлдээ нэвтрүүлж байна.
“Мах импекс” ХК BERTSCH-Laska компанитай 150 тэрбум төгрөгийн төсөвт өртөг бүхий хүнсний зориулалтын хөргөлттэй агуулах, мөн 40 тонны багтаамжтай махыг хорогдолгүй гэсгээх, мах ангилан сортлох үйлдвэр барих төслийг хэрэгжүүлэх юм.