Үндэсний үйлдвэрлэгч “Болор Импекс” компанийн харьяа “Болор Катеринг”-ийн хамт олон “Хүнсний хангамж, аюулгүй байдал” үндэсний хөдөлгөөний хүрээнд ХХАА-н салбарын баялаг бүтээгчдэд олгож буй Эргэлтийн хөрөнгийн зээлд хамрагдан үйлдвэрийн өргөтгөлөө ашиглалтад оруулан, хүчин чадлаа нэмэгдүүллээ. Энэхүү үйлдвэрийн өргөтгөлийн нээлт 2023 оны 10 сарын 20-ны өдөр боллоо. Нээлтийн ажиллагаанд Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр болон хамтран ажилладаг түнш байгууллагын төлөөлөлүүд оролцож, баяр хүргэв.
Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр: “Хүнсний хангамж, аюулгүй байдал” үндэсний хөдөлгөөний хүрээнд үйлдвэрлэгч, баялаг бүтээгчдэд хөнгөлөлттэй зээл олгох, ХХАА-н салбарын тоног төхөөрөмжийг гаалийн албан татвараас чөлөөлөх гэх мэт 24 төрлийн дэмжлэг үзүүлж байна. Санхүүжилттэй, бодлого нь оновчтой хөдөлгөөн хэрэгжиж байгаа нь эхнээсээ үр дүнгээ өгч байна. Жилийн өмнө Ерөнхийлөгчийн ажилласан болон Ерөнхийлөгчийн Тамгын газрын очиж танилцсан үйлдвэрүүд өнөөдөр шинэ үйлдвэр, өргөтгөл, шинэ тоног төхөөрөмж, шинэ ажлын байртай угтаж байна. Тодорхой нэг түвшинд ахиц гарсан гэдгээ баялаг бүтээгчид маань дуулгаж байна. “Болор Катеринг”-ийн хамт олон Хүнсний хувьсгалын хүрээнд 600 сая төгрөгийн зээл авч, авсан зээлээ зөв зарцуулж, үр дүнг нь богино хугацаанд гарган ажиллаж байгаад сайшаалтай байна.
“Болор Катеринг” ХХК-ийн захирал М.Болормаа: Монгол Улсын Ерөнхийлөгчийн санаачилсан “Хүнсний хангамж, аюулгүй байдал” үндэсний хөдөлгөөний хүрээнд олгогдож буй зээлд хамрагдаж, мөн 8 жилийн ойн дээрээ бүтээн байгуулалтаа босгож чадсан нь цаашид бизнесийн хүрээгээ тэлэх урам зориг өгч байна. Төлөвлөсөн ажлууд бий.
“Болор Импекс” ХХК нь 2015 оны 10 дугаар сарын 26-ны өдөр мах, махан бүтээгдэхүүний үйлдвэрлэл, гадаад худалдааны чиглэлээр үүсгэн байгуулагдсан. 2017 оноос “Болор Катеринг” нэртэй Явуулын ресторан катеринг үйлчилгээний чиглэлээр үйл ажиллагаагаа өргөжүүлэн явуулж байна.
Экспортын мах, махан бүтээгдэхүүний үйлдвэрлэл болон катерингийн цогц үйлчилгээг монголдоо нэвтрүүлсэн тус хамт олон 8 жилийн ойн дээрээ үйлдвэрийн өргөтгөлөө ашиглалтад орууллаа. Үйлдвэрийн бүтэц нь хоол үйлдвэрлэл, үйлчилгээний технологийн урсгал шугамыг баримталсан, ажлын байр нь шаардлагатай тоног төхөөрөмжөөр бүрэн хангагдаж чаджээ.
“Болор Катеринг” ХХК нь бүтээгдэхүүнээ хүнсний эрүүл ахуйн шаардлага хангасан тохирлын гэрчилгээгээр баталгаажсан ажлын байранд байнга дотоод хяналттайгаар үйлдвэрлэн гаргаж уул уурхайн ажилчдын өдрийн хоол, хүлээн авалт, хурал зөвлөгөөн, төрсөн өдөр, үсний найр, буяны ажил, шинэ жил, үдийн цай буюу breakfast уулзалт зэрэг үйл ажиллагаанд хүргэн ажилладаг. Тус хамт олон хоол үйлдвэрлэл, үйлчилгээний технологийн нэг урсгал шугамыг баримталсан, ажлын байр нь шаардлагатай тоног төхөөрөмжөөр бүрэн хангагдсан өргөтгөлөө ашиглалтад оруулсан амжилттайгаар “Болор Импекс” ХХК 8 жилийн ойгоо угтлаа.
