Монгол Улсын Ерөнхийлөгч Ухнаагийн Хүрэлсүхийн Бүгд Найрамдах Ардчилсан Лаос Ард Улсад хийж байгаа төрийн айлчлалын хүрээнд Монгол – Лаосын бизнес форум өнөөдөр /2023.11.06/ тус улсын нийслэл Вьентьян хотноо амжилттай зохион байгуулагдлаа.
Монголын үндэсний худалдаа, аж үйлдвэрийн танхим, Лаосын үндэсний худалдаа, аж үйлдвэрийн танхим, Монгол Улсаас Лаос Улсад суугаа Элчин сайдын яам хамтран зохион байгуулсан тус арга хэмжээнд Монголын талаас ХХААХҮ-ийн сайд Х.Болорчулуун, Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, МҮХАҮТ-ын ехөнхийлөгч Т.Энхтүвшин болон хөдөө аж ахуй, хөнгөн үйлдвэрлэл, аялал жуулчлал, уул уурхай, барилга, тээвэр зуучлал, уламжлалт анагаах ухааны бүтээгдэхүүн үйлдвэрлэл зэрэг салбар, чиглэлийн компанийн ААН-ийн 70 гаруй төлөөлөл, Лаосын талаас мөн тооны төлөөлөгчид оролцлоо.
Бизнес форумыг нээж Монгол Улсын ХХААХҮ-ын сайд Х. Болорчулуун, БНАЛАУ-ын Худалдаа, аж үйлдвэрийн дэд сайд Ванотонг Вонгсаи нар үг хэллээ.
МҮХАҮТ-ын Ерөнхийлөгч Д.Энхтүвшин Монгол Улсын бизнесийн орчин сэдвээр, БНАЛАУ-ын Худалдаа, аж үйлдвэрийн яамны Бодлого төлөвлөлтийн газрын дарга Сэнгфаномчоне Интасэнэ Лаос Улсын эдийн засгийн өнөөгийн байдал, хоёр улсын худалдаа, эдийн засгийн хамтын ажиллагаа боломжууд сэдвээр, Монгол Улсын ХХААХҮЯ-ны газрын дарга Э.Анар “Хүнс хөдөө аж ахуйн салбарын хөрөнгө оруулалтын боломжууд сэдвээр, Хүнсний хувьсгал ТББ-ын Удирдах зөвлөлийн гишүүн Г.Энхбилэг нар тус тус илтгэл тавьж, оролцогчдод мэдээлэл өгөв.
Мөн бизнес форумын үеэр МҮХАҮТ, ЛҮХАҮТ-ын хооронд хамтран ажиллах тухай харилцан ойлголцлын санамж бичигт хоёр талын танхимуудын Ерөнхийлөгчид гарын үсэг зурлаа.
Форумын үеэр хоёр улсын бизнес эрхлэгчдийн дунд танилцах, бизнесийн яриа хэлцэл хийх уулзалтууд, Монгол Улсын экспортын бараа бүтээгдэхүүний танилцуулах үзэсгэлэн зохион байгуулагдлаа.
Мөн айлчлалын хүрээнд “Монгол-Лаосын бизнес тур” аялал зохион байгуулагдана. Бизнес аяллаар Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, МҮХАҮТ-ын дэд дарга Ц.Магнайбаатар нараар ахлуулсан 70 гаруй бизнес эрхлэгчийн төлөөлөл Лаос улсын хүнс, хөдөө аж ахуй, эрчим хүч, аж үйлдвэрийн салбар үйлдвэрүүдтэй танилцах юм.
