Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр хөнгөн үйлдвэрийн салбарт баялаг бүтээж буй үндэсний үйлдвэрлэгч “Өлзий хаалга” ХХК-ийн хаалганы үйлдвэрт ажиллалаа.
“Өлзий хаалга” ХХК нь хоногт 150 гаруй хаалга үйлдвэрлэх хүчин чадалтай. Одоогийн байдлаар өдөрт 50 хаалга үйлдвэрлэж байгаа бөгөөд дэлхийн стандартад нийцсэн эдэлгээ сайтай бүх төрлийн төмөр хаалгыг монголдоо үйлдвэрлэж, дотоодынхоо зах зээлд хямд үнээр нийлүүлж байна.
Өлзий хаалганы үйлдвэр барилгын дотор, гадна, өрөө хоорондын, ажилчдын, сургуулийн болон эмнэлгийн гэх мэт бүх төрлийн аюулгүй ажиллагааг хангасан хаалга, төмөр шкаф, хувцасны шүүгээ үйлдвэрлэж байна. Цаашид үйлдэрлэлийн хүчин чадлаа нэмэгдүүлж дотоодын хэрэгцээний 10 хувийг дангаар хангах боломжтой гэдгийг захирал Б.Ариунболд хэллээ.
Монгол Улсын барилгын салбарт ашиглаж байгаа нийт хаалганы 70 гаруй хувийг импорт буюу ОХУ, БНХАУ, Герман, Солонгос улсын хаалга эзэлж байна. Тээврийн зардал, үнийн өсөлт, ханшийн уналт зэргээс шалтгаалан импортын хаалганы нийлүүлэлт чамгүй өндөр үнээр худалдаалагддаг. Мөн чанар муутай, угсралтын шатандаа эвдрэх зэрэг асуудал тулгардаг. Тэгвэл тус үйлдвэрийн дундаж хаалганы үнэ 500.000-с эхэлж байгаа нь хямд өртгөөр, чанартай, эдэлгээ сайтай хаалгыг дотоодоосоо худалдан авах боломжийг бүрдүүлж байна.
