Монгол Улсын Ерөнхийлөгч Ухнаагийн Хүрэлсүх Үндэсний эрх чөлөө, тусгаар тогтнолоо сэргээн мандуулсны 112 жилийн ойг тохиолдуулан зарлиг гаргаж, Хүнсний үйлдвэрийн салбарт эрүүл хөрсөнд ургуулсан жимс жимсгэнээр бүтээгдэхүүн үйлдвэрлэж, чацарганын аж ахуй байгуулан, хүнсний хангамжийг сайжруулах, иргэдийг эрүүл аюулгүй хүнсээр хангах төрийн бодлогыг хэрэгжүүлэхэд үнэтэй хувь нэмэр оруулсан “Завхан баялаг” ХК-ийн зөвлөх, Аж үйлдвэрийн гавьяат ажилтан Лавагийн Юрад “Монгол Улсын Хөдөлмөрийн баатар” цол хүртээж, “Алтан соёмбо” тэмдэг, Сүхбаатарын одонгоор шагнасан.
Өнөөдөр “Монгол Улсын Хөдөлмөрийн баатар” цол хүртсэн Лавагийн Юрад зориулсан хүндэтгэлийн арга хэмжээ боллоо.
Хүндэтгэлийн арга хэмжээнд Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр оролцож Төрийн тэргүүний мэндчилгээг уламжиллаа.
Тэрээр Үндэсний шилдэг Хүнс үйлдвэрлэгч “Завхан Баялаг” ХК-ийн хамт олонд ажлын амжилт хүсэн төрөлх нутгаараа овоглосон “Завхан баялаг” хувьцаат компанийн зөвлөх, Аж үйлдвэрийн гавьяат ажилтан, Монгол Улсын Хөдөлмөрийн баатар Лавагийн ЮРА-д эрүүл энх, урт удаан насалж,үр хүүхэд, төр түмэндээ түшиг нь болж явахын өлзийтэй сайхан ерөөлийг өргөн дэвшүүлэв.
“Завхан баялаг” хувьцаат компани нь орон нутагтаа мод үржүүлэг, жимс жимсгэнэ, хүнсний үйлдвэрлэл, худалдааны чиглэлээр үйл ажиллагаа эрхэлдэг бөгөөд 35 нэр төрлийн бүтээгдэхүүн үйлдвэрлэж буй баялаг бүтээгч юм.
Хүн амын эрүүл мэндийг хамгаалж, амин дэмээр баялаг, экологийн цэвэр бүтээгдэхүүнийг хэрэглэгчдийнхээ хэрэгцээ таашаалд нь нийцүүлж, сүүлийн үеийн технологи, олон улсын стандартыг хангасан бүтээгдэхүүн үйлдвэрлэж дотооддоо төдийгүй экспортод гаргах тэргүүн зорилт тавин ажиллаж байгаа тус хамт олон Монгол Улсын Ерөнхийлөгчийн санаачилсан “Хүнсний хангамж, аюулгүй байдал” үндэсний хөдөлгөөний хүрээнд Үндэсний шилдэг Хүнс үйлдвэрлэгч аж ахуй нэгж болсон юм.
Үйлдвэрийн бүтээгдэхүүнүүд нь байгалийн цэвэр, органик гаралтай. Өөрөөр хэлбэл, хүнд хэрэгтэй амин дэм болох витамин ихээр агуулдаг зэрлэг жимс болох нэрс, үхрийн нүд, чацарганаар бүтээгдэхүүнээ хийдэг онцлогтой.
Жилдээ 300 тонн архи, ундаа, жүүс, 150 тонн дарс, ликёр, 300 тонн цэвэр ус, 5 тонн цай, 50 тонн чихэр, 1000 тонн иоджуулсан давс үйлдвэрлэх хүчин чадалтай.
Монгол орныхоо эрүүл хөрсөнд ургуулсан жимс жимсгэнээр бүтээгдэхүүн үйлдвэрлэж, чацарганын аж ахуй байгуулан, хүн амын хүнсний хангамжийг сайжруулах, иргэдийг эрүүл аюулгүй хүнсээр хангах төрийн бодлогыг хэрэгжүүлэхэд үнэтэй хувь нэмэр оруулсан эрхэм хүний амьдралын түүх, амжилтын гараа, хөдөлмөрийн үр шим нь хойч ирээдүй болсон үр ач, хүүхэд залуустаа хийж бүтээе гэсэн урам зоригийн хөшүүрэг болох юм.
Нутаг орноос алдартан төрөхөд уул, ус, уугуул иргэд, лус савдаг хүртэл баярладаг. Төрөлх нутгаараа овоглосон “Завхан баялаг” хувьцаат компанийн зөвлөх, Монгол Улсын Хөдөлмөрийн баатар Лавагийн ЮРА таны ажилд нь амжилт, амьдралд нь сайн сайхан бүхний дээдийг хүсэн ерөөе.
