Малын чанар үүлдэрлэг байдлыг сайжруулах, мал аж ахуйн салбарын үйлдвэрлэлийн бүтээмжийг нэмэгдүүлэх, эрчимжсэн аж ахуй, эрхлэгчдийг чадавхжуулах, дэвшилтэд технологи нэвтрүүлэх зорилгоор Монголын мал зүйч үржүүлэгчдийн үндэсний холбоо, “Хүнсний хувьсгал” ТББ-тай хамтран “Хонины аж ахуй эрхлэгчдийн зөвлөгөөн”-ийг хоёр дахь жилдээ амжилттай зохион байгууллаа.
- Тус зөвлөгөөнд мал аж ахуйн салбарын эрдэмтэн, судлаач, орон нутгийн мэргэжилтнүүд, эрчимжсэн хонины аж ахуй эрхлэгч, малчдын төлөөллөөс бүрдсэн нийт 260 гаруй хүн оролцлоо.
Энэ жилийн “Хонины аж ахуй эрхлэгчдийн зөвлөгөөн”-д Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр оролцож, Монгол Улсын Ерөнхийлөгч У.Хүрэлсүх болоод Монгол Улсын засгийн газраас хүнс, хөдөө аж ахуйн салбарт хэрэгжүүлж байгаа бодлого, хөтөлбөрүүдийн талаар танилцуулж, малчид, хонины аж ахуй эрхлэгчидтэй нээлттэй ярилцсан юм.
Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр: Хүнс, хөдөө аж ахуйн салбараа энэ улс орны эдийн засгийн хувьд бодлогын салбар болгоё гээд Монгол Улсын Ерөнхийлөгч санаачлаад үндэсний томоохон хөтөлбөр, хөдөлгөөнүүдийг эхлүүлсэн. Хөдөлгөөнүүд өнөөдөр маш үр дүнтэй хэрэгжиж байна. Манай баялаг бүтээгч малчин ард түмэн маань малынхаа арьс шир, ноос ноолуур, мах сүү зэрэг малаас гарах бүх түүхий эдээр эцсийн бүтээгдэхүүн үйлдвэрлэн дотоод, гадаадын зах зээлд гаргах бүх боломжийг олгож байгаа. Монгол Улсын Ерөнхийлөгч У.Хүрэлсүх, Монгол Улсын засгийн газар, ХХААХҮЯ бүгд нэг чигт харж, нэг бодлогоор дэмжиж байна. Одоо “Хүнсний хувьсгал” хөдөлгөөн дээр 1.7 их наяд, “Цагаан алт” хөтөлбөр дээр 2.2 их наяд, “Шинэ хоршоо” хөдөлгөөн 5 их наяд нийлээд 8.9 их наяд төгрөгийн санхүүжилттэй хөтөлбөрүүд хүнс, хөдөө аж ахуйн салбарт хэрэгжиж байна. Тухайн салбарыг хөгжүүлэхийн тулд хамгийн түрүүнд санхүүжилтийг шийдэх ёстой. Өнөөдөр хууль, эрх зүйн орчин батлагдсан, төсөв санхүү ч шийдэгдчихсэн. Одоо бид хоршоод, нийлж хамтраад орчин үеийн ухаалаг хүнс, хөдөө аж ахуйн салбарыг газар тариалантай, мал аж ахуйн салбартай хослуулах нь зүйтэй. Газар тариалан, мал аж ахуйгаас гарсан эцсийн бүтээгдэхүүнийг хүнс үйлдвэрлэлийн салбар болон хөнгөн аж үйлдвэрлэлийн салбараар дамжуулаад бид өөрсдийгөө ч хувцасладаг, гадагшаа экспортлодог. Өөрсдийгөө ч хооллодог, гадагшаа хүнсээ экспортлодог улс болох боломжийг төр, засаг олгож байна.
Монгол Улсын гавъяат мал зүйч, Доктор Л.Эрхэмбаяр: Хонины аж ахуй эрхлэгчдийн зөвлөгөөнөөр бид өөрчлөгдөн байгаа байгаль, орчинд яаж дасан зохицох, яаж эрсдэлээ бууруулах уу? хонины ашиг шимийг хурдан хугацаанд яаж нэмэгдүүлэх, эдийн засгийн эргэлтээ яаж сайжруулах талаар хоорондоо ярилцаж байна. Эдийн засгийн эргэлтийг сайжруулна гэдгийг эрчимжүүлэх нь гэж ойлгодог. Эрчимжүүлэх асуудал огт биш. Монгол хонь гэдэг монголынхоо байгаль, цаг уурт дэндүү сайн зохицсон байдаг. Тиймээс өвөл, хавартаа хонины хашаа саравчаа дулаалах, толгой тутамдаа яаж 7 боодол өвс бэлдэх, бэлдсэн өвсөө малдаа идүүлж сургах. Өнтэй өвөл малдаа өвсөө идүүлэхгүй, өвс нь хуршаад үлддэг. Ийм байж болохгүй. Аль болох малаа цариг сайтай, жилбэ сайтай өвөлжүүлэхэд анхаарч ажиллах шаардлагатай болж байна. Ялангуяа сүүлийн үеийн залуу малчдад туршлага бага байна. Тиймээс уламжлалт мал маллах арга, ухааныг өвлүүлэх тал дээр анхаарч, чадавхжуулах шаардлага байна.
Зөвлөгөөнөөр хонины аж ахуйг хэрхэн эрчимжүүлэх, тэжээллэг арчилгаа, маллагааны талаарх олон төсөл арга хэмжээний туршилт үр дүнг танилцуулан тулгамдаж буй асуудлын талаар харилцан санал солилцов. Мөн хонийг орчин үеийн технологи ашиглан ноослох үзүүлэн сургалтыг зохион байгууллаа.
