Хөдөө аж ахуйн үйлдвэрлэлийг дэмжих бодлогын хүрээнд “Хүнсний хувьсгал”, “Цагаан алт”, “Шинэ хоршоо-Чинээлэг малчин” үндэсний хөдөлгөөний хэрэгжилтийг эрчимжүүлэх, үр нөлөөг дээшлүүлэх, бодлого, арга зүй, удирдлагаар дэмжих, хянах, хууль, эрх зүйн орчныг боловсронгуй болгох, хөтөлбөр хоорондын уялдааг сайжруулахыг судалж, танилцуулах үүрэг бүхий ажлын хэсэг байгуулагдсан. Тэгвэл тус ажлын хэсгийн ахлагч, УИХ-ын гишүүн М.Мандхай Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр болон ЕТГ-ын Хүнсний төсөл хөтөлбөрийн албаны төлөөллийг хүлээн авч уулзлаа. Уулзалтаар “Хүнсний хувьсгал” үндэсний хөдөлгөөний хэрэгжилт, явц, тулгамдаж буй асуудлыг танилцуулж, харилцан санал солилцлоо.