“Хүнсний хангамж, аюулгүй байдал” үндэсний хөдөлгөөний хэрэгжилт, үр дүнтэй танилцах “Зөвлөлдөх уулзалт” Булган аймагт боллоо. Булган аймгийн Засаг дарга Д.Пүрэв-Очир хурлыг нээж, аймгийн хүнс хөдөө аж ахуйн салбарын өнөөгийн байдал, хийж хэрэгжүүлсэн ажлуудыг танилцууллаа.
Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр “Хүнсний хангамж, аюулгүй байдал” үндэсний хөдөлгөөний хүрээнд улс даяар хийгдэж буй үйл ажиллагаа, дэвшүүлж буй зорилтуудын талаар танилцуулж, орон нутгийн 100 гаруй хүнсний үйлдвэрлэл эрхлэгчидтэй санал солилцлоо.
Булган аймаг 60 мянга гаруй хүн амтай бөгөөд дотоодын нийт бүтээгдэхүүний 60%-ийг хөдөө аж ахуйн салбараас бүрдүүлдэг байна. 2024 онд мал аж ахуйн салбараас 273.5 тэрбум төгрөгийн бүтээгдэхүүн нийлүүлжээ. Булган аймаг 92,0 мянган га эргэлтийн талбайтай, жилдээ 40,0-55,0 мянган га талбайд тариалалт хийж, 36,5-39,5 мянган га талбайд уринш бэлтгэж, тариалангийн талбайн ашиглалт 96.0 хувьтай байна. Мөн төмс, хүнсний ногоог 776 га талбайд тариалдаг болоод байна. Газар тариалангийн салбарт 126 аж ахуйн нэгж, иргэн үр тарианы, 1500 гаруй иргэн төмс, хүнсний ногоо, жимс, жимсгэнийн үйлдвэрлэл эрхэлж байгаа юм.
“Хүнсний хангамж, аюулгүй байдал” үндэсний хөдөлгөөний хүрээнд Булган аймгийн 14 иргэн, аж ахуй нэгж хөнгөлөлттэй зээлд хамрагдаж, мах махан бүтээгдэхүүн болон төмс хүнсний ногооны дотоодын хангамжын хэмжээг нэмэгдүүлж чаджээ.
Цаашид “Хүнсний хангамж, аюулгүй байдал” үндэсний хөдөлгөөний хүрээнд дараах ажлуудыг хийж гүйцэтгэнэ.
- Хөдөө аж ахуйн салбарын хүний нөөцийг бэлтгэх, залуу малчдыг чадавхжуулах олон улсын туршлагыг нэвтрүүлэх
- Мал аж ахуйн салбарын биотехнологи, ухаалаг технологи нэвтрүүлсэн төслүүдийг дэмжинэ
- Уур амьсгалын өөрчлөлтөд дасан зохицсон, эрсдэл даах чадвартай мал ахуйн салбарыг хөгжүүлнэ
- Малын үүлдэр угсааг сайжруулах зорилгоор үржлийн нэгжүүдийг Бүрэгхангай, Дашинчилэн, Сэлэнгэ, Хутаг-Өндөр суманд байгуулна
- Бэлчээрийг нөхөн сэргээх, сэлгэх, тарималжуулах, хамгаалах, усжуулах, арга хэмжээг хэрэгжүүлнэ
Мөн Бүсчилсэн хөгжлийн бодлогын хүрээнд хөдөө аж ахуйн салбарыг хөгжүүлэх Үйлдвэр технологийн паркыг байгуулах бөгөөд эрүүл ахуйн шаардлага хангасан мах, сүү сүүн бүтээгдэхүүнээр Хойд бүсийн иргэдийг хангахын зэрэгцээ түүний дагалдах баялаг арьс шир боловсруулах ноос угаах зэрэг үйлдвэрүүдийг барихаар төлөвлөөд буй.
