Хувцас үйлдвэрлэлийн салбар нь ноос, ноолуур, арьс, ширэн түүхий эдийг эцсийн бүтээгдэхүүн болгон нэмүү өртөг хамгийн их шингээдэг үйлдвэрлэлийн салбар юм. Оёдлын салбар нь харьцангуй бага хөрөнгө оруулалтаар олон хүний ажлын байрыг бий болгодог төдийгүй түүхий эдийг бүрэн боловсруулан эцсийн бүтээгдэхүүн үйлдвэрлэдэг нийгэм, эдийн засгийн өндөр үр өгөөжтэй, онцлог, чухал салбар юм.
Хувцас үйлдвэрлэлийн салбарын мэргэжлийн нэгдсэн холбооны зөвлөлдөх уулзалтад салбарын мэргэжлийн холбоод баялаг бүтээгчдээс бүрдсэн 100 гаруй төлөөлөл оролцов
Тэгвэл хувцас үйлдвэрлэлийн салбарынхан Мэргэжлийн нэгдсэн холбооны эрх зүйн байдлын тухай хууль хэрэгжихтэй холбогдуулан зөвлөлдөх уулзалтаа хийлээ. Зөвлөлдөх уулзалтыг “Баялаг бүтээгчдийг дэмжих холбоо”-оос зохион байгуулсан бөгөөд Монголын оёдлын нэгдсэн холбоо, Монголын арьс ширний үйлдвэрлэлийн холбоо, Монголын ноосны холбоо, Монголын хувцасны дизайнеруудын холбоо дэмжин оролцов. Мөн хувцас үйлдвэрлэлийн салбарын баялаг бүтээгчдээс бүрдсэн 100 гаруй төлөөлөл оролцсон өргөн бүрэлдэхүүнтэй зохион байгуулагдлаа.
Зөвлөлдөх уулзалтад ХХААХҮЯ-ны Хөнгөн үйлдвэрийн бодлогын хэрэгжилтийг зохицуулах газрын дарга М.Дондогдорж, ЭЗХЯ-ны Хөрөнгө оруулалтын нэгдсэн бодлогын газрын дарга Б.Анар, Гаалийн Ерөнхий газрын Бараа ангилал, үнэлгээний хэлтсийн дарга Ч.Чимгэрэл, Зээлийн батлан даалтын сангийн Төсөл бизнес хөгжлийн газрын дарга Э.Тамир, хуульч Э.Амарбаясгалан нарын албаныхан оролцож, салбарын өнөөгийн байдал, Экспорт, импорт, Оёмол бүтээгдэхүүний гаалийн тариф, хөнгөлөлт зэрэг сэдвээр мэдээлэл өгч хэлэлцүүлэг өрнүүллээ.
Мэргэжлийн нэгдсэн холбооны эрх зүйн байдлын тухай хууль 2024 оны дөрөвдүгээр сарын 19-ний өдөр батлагдсан. Хуулийн хэрэгжилт 2025 оны нэгдүгээр сарын 1-ний өдрөөс эхлэх бөгөөд эдийн засгийн ангилал бүрээр нэг мэргэжлийн холбоод байгуулагдах учиртай. Тэгвэл хувцас үйлдвэрлэлийн салбарынхан мэргэжлийн нэгдсэн холбоо үүсгэн байгуулахаар нэгдсэнээ ийнхүү албан ёсоор зарлаж байна.
Хувцас үйлдвэрлэлийн салбарын нийтлэг эрх ашгийг хамгаалж, баялаг бүтээгчдийн дуу хоолойг нэгтгэн төрд хүргэхэд “Мэргэжлийн нэгдсэн холбоо” болж нэгдэх нь хамгийн чухал гэж үзлээ
Баялаг бүтээгчдийг дэмжих холбоо нь 2015 онд үйлдвэрлэл эрхлэгчдийн хүсэлт, нийгмийн шаардлагаар үүсгэн байгуулагдаж өдгөө нийслэлийн 9 дүүрэг, 21 аймагт салбар хороотой, 10 мянга гаруй идэвхтэй гишүүд, дэмжигчидтэй мэргэжлийн холбоо юм. Тэд энэ хугацаанд Монгол орноо хоёр удаа бүтэн тойрч, “Баялаг бүтээгч” хэмээн мянга гаруй үндэсний үйлдвэрлэгчдийг алдаршуулж, төрд дуу хоолойгоо хамгийн чангаар, хамгийн хүчтэйгээр хүргэж ирсэн идэвхтэй үйл ажиллагаа явуулж буй Төрийн бус байгууллага юм. Тэгвэл Баялаг бүтээгчдийг дэмжих холбоо 2025 оны төлөвлөгөөт ажлаа “Хувцас үйлдвэрлэлийн салбарын мэргэжлийн нэгдсэн холбоо”-ны зөвлөлдөх уулзалтаар амжилттай эхлүүлж байна.
