Монгол Улсын Ерөнхийлөгчийн санаачилсан “Хүнсний хувьсгал” үндэсний хөдөлгөөний дэргэдэх эрдэмтдийн зөвлөлийн дарга Ч.Даваабаяр, эрдэмтдийн зөвлөлийн орлогч дарга В.Мөнгөнсүх болон зөвлөлийн 20 гаруй эрдэмтэд өргөн бүрэлдэхүүнтэйгээр Хүнс, хөдөө аж ахуй, хөнгөн үйлдвэрийн судалгаа хөгжлийн төвд ажиллалаа. Эрдэмтдийн зөвлөлийн гишүүн, Хүнс, Хөдөө аж ахуй, хөнгөн үйлдвэрийн судалгаа хөгжлийн төвийн захирал, доктор Б.Батхүү Хүнс, хөдөө аж ахуй, хөнгөн үйлдвэрийн судалгаа хөгжлийн төвийн үйл ажиллагааг танилцууллаа.

ХХААХҮЯ-ны дэргэдэх “Хүнс, хөдөө аж ахуй, хөнгөн үйлдвэрийн судалгаа, хөгжлийн төв” нь Засгийн газрын 2020 оны 9 дүгээр сарын 3-ны 93 тоот тогтооолоор байгуулагдсан байна. “Хөнгөн үйлдвэрийн судалгаа, туршилт, үйлдвэрлэл, бизнесийн корпораци” төрийн өмчит аж ахуйн тооцоот үйлдвэрийн газар, “Хөдөө аж ахуйн үйлдвэрлэлд шинжлэх ухааны ололт нэвтрүүлэх төв” улсын төсөвт үйлдвэрийн газрыг нийлүүлэх замаар “Хүнс, хөдөө аж ахуй, хөнгөн үйлдвэрийн судалгаа, хөгжлийн төв” улсын төсөвт үйлдвэрийн газрыг байгуулжээ.

Тус төв нь салбарын үйл ажиллагаанд мэргэжил, арга зүйн туслалцаа үзүүлэх, эрдэм шинжилгээ, судалгаа туршилт, инкубаци, шинжлэх ухааны ололт, дэвшилтэт техник технологийг үйлдвэрлэлд нэвтрүүлэх, дамжуулах, сурталчлах, мэдээ мэдээллээр хангах чиг үүрэг бүхий зөвхөн төрийн хэрэгцээнд зориулсан сургалт, үйлдвэрлэлийн чиглэлээр үйл ажиллагаа эрхэлдэг төрийн өмчит улсын төсөвт үйлдвэрийн газар юм.

Хүнс, хөдөө аж ахуй, хөнгөн үйлдвэрийн судалгаа хөгжлийн төв нь шинжлэх ухаан, технологи, суурь судалгааны төслүүдийг хэрэгжүүлэх, инновацийн загварууд, оюуны өмчүүдийг бий болгох, олон улсын стандарт нэвтрүүлэх зорилготой үйл ажиллагаа явуулж буй.

2024-2028 оны Засгийн Газрын үйл ажиллагааны хөтөлбөрт тусгах арга хэмжээг танилцууллаа.

Үүнд:

• ХАА-н гаралтай түүхий эдийн (мах, сүү, үр тариа, төмс, хүнсний ногоо, арьс шир, ноос ноолуур гэх мэт) мөшгөх тогтолцоог нэвтрүүлэн малчид, тариаланчид үйлдвэрлэгчдийн ашигт ажиллагааг чанаржуулан дэмжих “Үндэсний чанарын сүлжээ” хөтөлбөрийг хэрэгжүүлэх
• Газар тариалан, мал аж ахуйгаас авах ашиг шимийг нэмэгдүүлэх, хүнс болон хөнгөн үйлдвэрийн бүтээгдэхүүний инновацийг судлах, нэвтрүүлэх, мэдлэг мэдээллийг түгээх
• Салбарын хүний нөөцийн мэдлэг чадварыг дээшлүүлэх сургалтын хөтөлбөрийг улс орон даяар хэрэгжүүлэх