Европын холбоо хүнсний хог хаягдлыг 2030 он хүртэл бууруулах шинэ зорилтуудыг тодорхойлон гишүүн орнууддаа зарлаад байна.
Зорилгодоо хүрэх үйл явцыг хурдасгахын тулд хүнсний хаягдлыг боловсруулах, үйлдвэрлэхэд 10 хувиар, жижиглэн худалдаа, хэрэглээнд (ресторан, хүнсний үйлчилгээ, өрхөд) 30 хувиар (нэг хүнд ногдох) тус тус бууруулах нэмэлт заалтыг гишүүн орнууддаа танилцуулаад байна. “Дэлхийн Тогтвортой Хөгжлийн Зорилт (SDG) 12.3 зорилтын хүрээнд 2030 он гэхэд жижиглэнгийн болон хэрэглэгчийн түвшинд нэг хүнд ногдох хүнсний хог хаягдлыг хоёр дахин бууруулах, хүнсний үйлдвэрлэл, нийлүүлэлтийн сүлжээн дэх хүнсний алдагдлыг бууруулах зэрэг багтдаг
2020 онд Европын улс орнуудын хэмжээнд хүнсний хог хаягдлын хэмжээг хянах судалгаа явуулжээ. Энэхүү судалгааны үр дүнг суурь мэдээлэл болгон ашиглах, ахиц дэвшлийг нэмэгдүүлэх, үйл явцын чанарыг сайжруулах зэрэг үе шаттайгаар хэрэгжүүлэхээр болжээ. 2020 оноос өмнө хэрэгжүүлсэн арга хэмжээний талаарх хэрэгжилтийн баримт бичгүүдийг шүүн, ахиц гаргасан гишүүн орнуудын хөтөлбөрийг жишиг болгон 2027 оны эцэс гэхэд гишүүн орнуудын үйл явцын хэрэгжилт, ахиц дэвшлийн үр дүнг албан ёсоор дүгнэнэ гэдгээ мэдэгджээ.
Харин Европын орнуудын хувьд үзвэл жил бүр 59 сая тонн хүнсний бүтээгдэхүүн хог болон хаягдаж байна. Европын холбооноос хүнсний хог хаягдалтай тэмцэх нь “гурвалсан ялалт” хэмээн цохон тэмдэглэв. Үүнийг тайлбарлавал хүнсээ өдрийн хэрэглээндээ зориулах, хүнсний хог хаягдал буурснаар байгаль орчинд үзүүлэх нөлөөлөл багасах, бизнес эрхлэгчид, хэрэглэгчид санхүүгээ хэмнэн зарцуулах гурав аж.
“Too Good To Go” компанийн гүйцэтгэх захирал Метте Ликке: “Дэлхийн хүнсний хог хаягдлыг бууруулах асуудал нь хүн бүрийн ёс зүйн шаардлага төдийгүй улс орны эдийн засгийн өсөлт, инновацийн боломж юм. Хүнсний хог хаягдал нь нийлүүлэлтийн сүлжээнд асар том сорилт болдог. Манай зах зээл түншүүддээ 239 сая хоолыг хог хаягдлаас хэмнэхэд нь тусалсан ч маш сайн хоол хүнс дэмий үрэгдэх хэвээр байна” хэмээн хэлжээ.
