Энэ сарын 17-ны өдөр ОХУ-ын зүгээс “Хар тэнгисийн үр тарианы гэрээ”-г түдгэлзүүлж байгаагаа мэдэгдсэн билээ. Улмаар Кремлиэс анхааруулснаар гэрээг түдгэлзүүлсэн энэ хугацаанд Хар тэнгист зорчих бүх хөлгийг Украины талд орж байна гэж үзэх болно гэсэн юм.
Тэгвэл “Хар тэнгисийн үр тарианы гэрээ”-г түдгэлзүүлснээр олон улсын зах зээлд улаан буудайн үнэ өсөх болжээ.
Тодруулбал, өнгөрөгч Лхагва гарагт Европын зах зээлд улаан буудайн үнэ 8.2 хувиар өссөн бол эрдэнэ шишийн үнэ 5.4 хувиар өссөн байна. Харин АНУ-ын зах зээлд улаан буудайн фьючерсийн үнэ 8.5 хувиар өсжээ. Энэ нь 2022 оны хоёрдугаар сард ОХУ Украины нутаг дэвсгэрийг эзлэн түрэмгийлж эхэлснээс хойш АНУ-ын зах зээлд үр тариан фьючерсийн үнэ хамгийн өндөр хувиар өссөн үзүүлэлт болсон юм.
Үүнээс үүдэн шинжээчид хийгээд эдийн засагчдын зүгээс талх, гоймон зэрэг боловсруулсан хүнсний бүтээгдэхүүний үнэ ч ээлж дараалан өсөх вий гэж эмээж буйгаа хуваалцсан байна. Хэрэв тэгвэл олон улсад инфляц ахин хөөрөгдөх эрсдэлтэй билээ.