Монгол Улсын Ерөнхий сайдын ивээл дор “Мал аж ахуйн сэргэлт” Залуу малчдын үндэсний чуулган Төрийн ордонд зохион байгуулагдаж байна.
Залуу малчдын чуулганд Булган аймгийн Хангал суманд Барга үүлдрийн махны чиглэлийн илүү нугаламт хонь өсгөн үржүүлж буй Х.Эрдэнэбулган “Хотоос хөдөөд шилжиж малчин болсон миний туршлага” сэдвээр илтгэл тавьсан юм. Тэрээр одоогоос 4 жилийн өмнө суурин амьдралын хэв маягаас нүүдэлчин ахуй соёл руу шилжих шийдвэр гаргаж, Дорнод аймгийн Хөлөнбуйр сумаас 300 толгой хээлтэгч хонь авчирч аж ахуйгаа эхлүүлж байжээ.
Малчин Х.Эрдэнэбулган:
-Суурин иргэншлийн элдэв хүлээснээс өөрийгөө чөлөөлөх гэж орон нутгийг зорьсон. Сэтгэлгээний өөрчлөлт хийхийг хүссэн гэж хэлж болно.
Өнөөдрийн чуулган чухал холбогдолтой. Малчинг харах өнцөг харилцан адилгүй байдаг. Тэр дундаа залуу малчид маань өөрсдийнхөө үнэ цэнийг мэдээсэй гэж хүсдэг. Хүнд адлагдаж мал дээр гараач, ажилгүй, боловсролгүй гэж хэлүүлэхгүйн тулд нийгэмд багш, эмч, уурхайчин гэдэг шиг нийгэмд чухал оролцоотой гэдгээ таньж , өөрсдийгөө үнэлж дүгнэх нь маш чухал.
Малчид малын тоо гэхээсээ илүүтэйгээр чанарт анхаарч эхэлсэн байна. Гол шалтгаан нь бэлчээрийн хомсдол. Энэ эрчээрээ байвал арван жилийн дараа нүүдлийн мал аж ахуй байх уу үгүй юу гэдэг дээрээ тулах магадлалтай.
Зүүн гурван аймаг хээрийн өвс, ургамалгүй болж, арван жилийн дараа нүүдлийн мал аж ахуй байх эсэх дээрээ тулчихаад байна. Зүүн гурван аймгийн тал нутаг тийм сайхан байсан юм шүү гээд дуу, ярианд үлдчих вий дээ.
Төр нь арга хэмжээ авч, ямар нэг зохицуулалт хийхгүй бол шийдэл гарц, гаргалгаа ярьдаг малчдын тоог нэмэгдүүлмээр байна.
Зөвхөн миний мянган мал болж байна бусад нь надад хамаагүй гэдэг бэртэгчин малчдаасаа салаад, үр хүүхэд, ач зээгийн үед бэлчээрийн, нүүдлийн мал аж ахуй байх ёстой гэдэг бодолтой малчдын тоог нэмэгдүүлбэл мал чанаржиж, бэлчээр хамгаалагдах нь илүү бодитой болох болов уу гэж боддог гэв.
