УИХ-ын 36 дугаар тогтоолын хэрэгжүүлэгч төрийн байгууллагуудын хэрэгжилтийн тайланг нарийвчлан тооцох зорилго бүхий урьдчилсан хэлэлцүүлэг өнөөдрөөс эхэллээ.
Өнөөдөр Төрийн ордны Нутгийн удирдлагын танхимд Хүнс, хөдөө аж ахуй, хөнгөн үйлдвэрийн салбарын эрх зүйн орчныг сайжруулах, Удирдлага, зохион байгуулалтыг сайжруулах шинэчлэх асуудлаар салбар яамд, төрийн байгууллагуудын удирдлагууд хэлэлцэж байна.
Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр хэлэлцүүлгийг нээж үг хэллээ. Тэрээр хэлсэн үгэндээ “Хүнсний хангамж, аюулгүй байдлыг хангах талаар авах арга хэмжээний тухай” УИХ-ын 36 дугаар тогтоолын хэрэгжилтийг нарийвчлан тооцож, хариуцагч байгууллага бүрийн төлөвлөгөөний биелэлт ямар шатанд явж байгааг урьдчилсан байдлаар танилцана” гэв.
Урьдчилсан хэлэлцүүлгийг ЕТГ-ын Хүнсний төсөл, хөтөлбөрийн албаны дарга А.Амаржаргал даргалж байна.
Урьдчилсан хэлэлцүүлэгт Улсын Их хурлын Тамгын газар, УИХ-ын Байгаль орчин, хүнс, хөдөө аж ахуйн байнгын хороо, Хууль зүй, дотоод хэргийн яам, Хүнс, хөдөө аж ахуй, хөнгөн үйлдвэрийн яам, Боловсрол, шинжлэх ухааны яам, Эрүүл мэндийн яам, Байгаль орчин, аялал жуулчлалын яам, Сангийн яам, Зам, тээврийн хөгжлийн яам, Эрчим хүчний яам, Уул уурхай, хүнд үйлдвэрийн яам, Үндэсний статистикийн хороо, Стандарт, хэмжил зүйн газар, Гаалийн ерөнхий газар, Жижиг, дунд үйлдвэрийн газар, Хүнсний аюулгүй байдлын үндэсний лавлагаа лаборатори, ШУТИС, Хүнс, хөдөө аж ахуйн салбарын Эрдэмтдийн зөвлөл, Хүнсний хувьсгал төрийн бус байгууллага оролцож байна.
Энэ хүрээнд Ерөнхийлөгчийн Тамгын газрын Хүнсний төсөл, хөтөлбөрийн албанаас УИХ-ын 36 дугаар тогтоолын хэрэгжилтийг нарийвчлан тооцох зорилгоор хариуцагч байгууллагуудын ажлыг тогтоолын дагуу бүлэглэн урьдчилсан уулзалт, хэлэлцүүлэг 2024 оны 2 дугаар сарын 21-27-ны өдрүүдэд зохион байгуулж байна.
