Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр генийн дараалал тогтоох NGS технологийг Монгол Улсад нутагшуулж буй Есөн мед ХХК-ийн төлөөллийг хүлээн авч уулзлаа. Уулзалтаар генетикийн дараалал тогтоох NGS технологийн Хөдөө аж ахуйн салбарт хэрхэн хэрэгжүүлж байгаа талаар мэдээлэл өгч, харилцан санал солилцлоо. Уг технологийг олон улсад эрүүл мэндийн салбар төдийгүй хүнс, хөдөө аж ахуйн салбарт хүнсний чанар, ургамал, үр тариа, малын үр шим сайжруулах чиглэлд өргөнөөр ашигладаг байна. Тухайлбал:

• Малын ашиг шимийн үндсэн чиглэлийн дагуу генетикийн хувьд ялгаатай байдлыг тогтоож, эрлийзжүүлэх, үүлдэр, омгийг тодорхойлоход
• Мах, сүүний гарцыг нэмэгдүүлэхэд чиглэн тэсвэрт чанар, бэлчээр ашиглах чадвар, биеийн жин, өсөлтийн давуу байдал зэргийг генетикийн хувьд тодорхойлох
• Монгол улсын газарзүйн байршлаас хамаарч сайн чанарын ноос ноолуур гаргадаг ямааны үүлрүүдийн дунд генетик судалгаа хийж, ямааны ноолуурын гарцыг нэмэгдүүлэх зорилгоор ямааны үүлдрийг сайжруулах
• Малын үржил шим сайтай тэжээлийн ургамлын сортыг тодорхойлох
• Ургамал, газар тариалангийн салбарт
• Газар тариалангаас авах ургацын хэмжээг нэмэгдүүлэх, Монгол улсын цаг агаарын байдалд тохиромжтой сорт гарган авах
• Хөрсний бичил биетний судалгааг хийж, хог ургамал ургах нөхцөлийг бууруулах гэх мэт олон талт ажлуудыг улсын болон хувийн байгууллага, эрдэм шинжилгээ судалгааны хүрээлэнтэй хамтран хэрэгжүүлэх боломжтой юм.

Дээрх ажлыг улсын хэмжээнд хэрэгжиж буй “Хүнсний хувьсгал” үндэсний хөдөлгөөнтэй уялдуулах нь эдийн засгийн хувьд өндөр ач холбогдолтой гэж талууд үзэж, цаашид хамтрах боломжтой гэдгээ Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр илэрхийллээ.