Төв аймгийн тариаланчид энэ онд 490.7 мянган тонн ургац хураан авч, нийт ургацын хэмжээгээрээ улсдаа тэргүүллээ.
Тус аймгийнхан газар тариалангийн салбарт сүүлийн 40 жилд байгаагүй өндөр ургац хураан авсан амжилтаа өнөөдөр тэмдэглэв.
Энэ онд аймгийн хэмжээнд 140 042 га талбайд тариалалт хийж, нийт 490 783 тонн ургац хураан авчээ. Ингэснээр нийт ургацын хэмжээ төдийгүй үр тариа, төмс, таримал тэжээлийн үйлдвэрлэлээрээ улсын хэмжээнд тэргүүлж, газар тариалангийн салбартаа түүхэн амжилт тогтоосон байна.
Тодруулбал, улсын хэмжээнд хураан авсан үр тарианы 23, төмсний 56, хүнсний ногооны 18, тосны ургамлын 15, таримал тэжээлийн 55 хувийг Төв аймгийн тариаланчид дангаараа үйлдвэрлэжээ. Энэ нь тус аймаг улс орны хүнсний хангамж, хөдөө аж ахуйн үйлдвэрлэлд чухал хувь нэмэр оруулж байна.
Улаан буудайн нийт ургацын хэмжээгээр Цээл сумын “Цээлийн хур” ХХК 2307 га талбайгаас 4276 тонн, Заамар сумын “Тосон овоот хайрхан” ХХК 2000 га талбайгаас 4600 тонн улаан буудай тус тус хураан авчээ.
Харин улаан буудайн нэгжийн ургацаар Эрдэнэсант сумын “Буянт төв” ХХК тэргүүлж, 1069 га талбайгаас 4276 тонн буюу га тутмаас 40 центнер ургац хураан авсан байна. Мөн Сүмбэр сумын “Дийлэгч тэнгэр” ХХК 407 га талбайд улаан буудайн үр үржүүлэг хийж, 1000 тонн ургац хураажээ.
Төмсний нийт ургацын хэмжээгээр Жаргалант сумын “Жаргалант шим газар” ХХК 200 га талбайгаас 3000 тонн төмс хураан авч тэргүүлсэн бол нэгжийн ургацаар Батсүмбэр сумын “Агро-Альфа” ХХК манлайлжээ. Тус компани 35 га талбайгаас 980 тонн төмс хураан авсан нь га тутмаас 280 центнер ургац авсан үзүүлэлт юм.
Хүнсний ногооны нийт ургацаар Цээл сумын “Жаврай үр” ХХК тэргүүлж, 167 га талбайгаас 3925 тонн ургац хураан авсан бол таримал тэжээлийн үйлдвэрлэлээр Аргалант сумын “Хосбэрс” ХХК манлайлж, 370 га талбайгаас 4500 тонн тэжээлийн ургамал хураан авчээ.
Энэ жилийн “Алтан намар-2026” ургацын баярын үеэр “Шилдгийн шилдэг тэргүүний тариаланч сум”-аар Батсүмбэр сум шалгарсан байна.
Эх сурвалж: Монцамэ агентлаг
