Дорноговь аймаг Монгол Улсын Ерөнхийлөгчийн санаачилсан “Хүнсний хувьсгал” үндэсний хөдөлгөөний хэрэгжилтийг орон нутагт эрчимжүүлэх, хүнсний ногооны хангалтыг нэмэгдүүлэх зорилгоор “ШИНЭ ХӨДӨӨ” -Дорноговь төслийг хэрэгжүүлж өнгөрсөн тавдугаар сард газар тариалан эрхлэгч, эрхлэхээр сонирхож буй аймгийн 350 иргэн, аж ахуй нэгжид 350 ширхэг хамгаалагдсан хөрсний тариалан буюу хүлэмж олгосон.
Тодруулбал, Солонгос Улсад үйлдвэрлэсэн хүлэмж, тармуур, комбайн, 20 трактор, усны нөөцийн сав зэргийг сумдын хүнсний ногоо эрхлэгч, компани аж ахуйн нэгжүүдэд гардуулсан юм. Аймгийн Хүнс, хөдөө аж ахуйн газраас хүлэмж авсан зарим иргэдийн ашиглалтын байдал болон тариалалтын явцтай танилцахад 71,4 хувь нь хүлэмжээ барьж тариалалтаа эхлүүлсэн байна.
Дорноговь аймаг хүн амын махны хэрэгцээний 100 хувь, сүүний хэрэгцээний 76 хувь, өндөгний хэрэглээний 60 хувь, гурилан бүтээгдэхүүний 5,4 хувь, төмс, хүнсний ногооны 10,7 хувийг тус тус хангаж байна. Хамгаалагдсан хөрсний хүлэмжтэй болсноор цаг агаарын хүнд нөхцөлд ч тариалан эрхлэх боломж бий. Ингэснээр Дорноговийн тариаланчид хүнсний ногооны хэрэгцээг орон нутгаасаа 100 хувь хангаж ажиллах боломж бүрдэх юм.
2023 оны Хаврын тариалалтаар аймгийн хэмжээнд 339 өрх, 30 аж ахуйн нэгж, байгууллага төмс 21.8 га-д, хүнсний ногоо 81.9 га-д, жимс, жимсгэнэ 9,6 га-д, малын тэжээлийн ургамал 55,1 га-д нийт 168,4 га талбайд тариалалт хийж өмнөх оны мөн үеэс талбайн хэмжээ 35,4 га талбайгаар нэмэгдсэн дүнтэй байгаа талаар аймгийн ХХААГ-ын хэвлэл мэдээллийн албанаас мэдээллээ.
