“Хүнсний хувьсгал” үндэсний хөдөлгөөний хүрээнд үндэсний үйлдвэрүүдийн үйл ажиллагаатай танилцаж байна.
Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Мал эмнэлгийн ерөнхий газрын дарга А.Нарантуяа, МЭЕГ-ын Мал амьтны өвчингүй тайван байдлыг баталгаажуулах, гадаад худалдааны чөлөөт байдлын асуудал хариуцсан мэргэжилтэн Б.Дэлгэрмаа, Олон улсын санхүүгийн корпорацийн зөвлөх Х.Ганзориг нарын албаны хүмүүс өнөөдөр (2023.12.13) мал аж ахуй, газар тариаланг харилцан ашигтайгаар хослуулан хөгжүүлж, Монгол махыг дэлхийн стандартад нийцүүлэн экспортлох гарааг эх орны зах зээлээс эхлүүлж яваа “Метагро Хөдөө аж ахуйн цогцолбор”-ын үйл ажиллагаатай танилцлаа.
Гүйцэтгэх захирал Т.Мөнхтөр болон цогцолборын хамт олон хүлээн авч Метагро Гарден кемп, газар тариалангийн бүтээн байгуулалт, үхэр бордох аж ахуйн үйл ажиллагаагаа танилцуулж, Монгол махыг дэлхийн зах зээлд гаргах бодлого, төлөвлөгөөгөө танилцууллаа.
Үндэсний үйлдвэрлэгч Метагро компани нь Хэнтий аймгийн Хэрлэн сумын нутаг Чандганы талд нэг дор 5000 үхэр бордох хүчин чадалтай үхрийн аж ахуй, малын эмнэлэг, мал аж ахуйн болон үр тарианы лаборатори, 10250 га талбай газар тариалан, мал төхөөрөх үйлдвэр, тэжээлийн аж ахуй, усалгааны систем зэрэг олон улсын жишигт нийцсэн эрчимжсэн мал аж ахуй, ухаалаг газар тариалан хосолсон цогцолбор төслийг 2021 оноос хэрэгжүүлэн ажиллаж байна.
Мэтагро компани бэлчээрт өссөн бага залуу үхрийг олон улсын стандартад нийцсэн үхэр бордох аж ахуйдаа хүлээн авч, өөрийн талбайд ургуулсан тэжээлээр 150 хоног бордож, өөх мах нь алагласан өндөр зэрэглэлийн үхрийн махыг бэлтгэн жилд 10000-15000 толгой үхэр зах зээлд нийлүүлж байна.
Бордох аж ахуйн үхрийн тэжээлийг Канадын зөвлөх компанийн боловсруулсан жороор бэлтгэдэг бөгөөд бүх улирлын турш бүлээн ус уух боломжтой услуурын систем нь үхрийг үр дүнтэй бордож, махыг гантиглуулах нэг үндэс болдог байна.
Өнөөдрийн байдлаар 120 гаруй ажлын байрыг бий болгож, орон нутгийн эдийн засагт үр ашиг нэмэгдүүлэн ажиллаж байна.
