Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр Өвөрхангай аймгийн Арвайхээр суманд “Хүнсний хангамж, аюулгүй байдал” үндэсний хөдөлгөөний хүрээнд аймагтаа талх, нарийн боов үйлдвэрлэдэг “Өв Үр Жүр” ХХК-ний үйлдвэрийн үйл ажиллагаатай танилцлаа.
Тус үйлдвэр 2018 оноос эхлэн үйл ажиллагаа явуулж байгаа бөгөөд “Хүнсний хувьсгал” үндэсний хөдөлгөөний хүрээнд олгодог бага хүүтэй, урт хугацаатай хөнгөлөлттэй зээлд хамрагдан үйлдвэрийн тоног төхөөрөмжийг шинэчилж, нутгийн брэнд бүтээгдэхүүн үйлдвэрлэж байна. Ингэхдээ “Үдийн цай” хөтөлбөрийн хүрээнд сумынхаа гурван цэцэрлэг, хоёр ерөнхий боловсролын сургуульд брэнд бүтээгдэхүүн болсон еэвэн, шөлний боорцгийг нийлүүлдэг юм.
Мөн 10 гаруй хүнийг ажлын байраар хангаж, Өвөрхангай аймгийн бүх сумдад бүтээгдэхүүнээ борлуулахаас гадна Баянхонгор, Архангай аймгийн зарим сумдын иргэдэд шинэ, стандартын шаардлага хангасан талх, нарийн боов түгээж байна.
Орон нутгийн хүнсний салбарын баялаг бүтээгчид Бүсчилсэн хөгжлийн бодлогын хүрээнд “Хүнсний хувьсгал” үндэсний хөдөлгөөний 2 дугаар шатыг эхлүүлэн эрчимжүүлж, жижиг дунд үйлдвэрлэлийг дэмжих хэрэгтэйг хэлж байв.
