НҮБ-ын Хүнс, хөдөө аж ахуйн байгууллагын төв байр байрладаг Италийн Ром хотноо Дэлхийн хүнсний форум зохион байгуулагдаж байна. Аравдугаар сарын 12-нд эхэлсэн тус форум энэ сарын 16-ныг хүртэл үргэлжлэх бөгөөд “Өнөөдөр инновац нэвтрүүлж, маргаашийг хүнсээр тэтгэнэ” уриан дор хүнсний тогтолцооны шинэчлэл, хүнсний аюулгүй байдал, тогтвортой үйлдвэрлэлийн асуудлыг хэлэлцэж байна.

Энэ удаагийн форумын хүрээнд хиймэл оюун ухаан, робот техник, биотехнологи болон дижитал шийдлийг хөдөө аж ахуйд нэвтрүүлэх, уур амьсгалын өөрчлөлтөд дасан зохицох, хүнсний үйлдвэрлэлийн үр ашгийг нэмэгдүүлэх чиглэлээр олон улсын төлөөлөгчид санал солилцож байна.

FAO-гийн зүгээс шинжлэх ухаан, технологийн дэвшил нь зөвхөн шинэ нээлтээр хязгаарлагдах бус, тариаланчид, малчид болон хүнсний үйлдвэрлэл эрхлэгчдэд бодитоор хүрч, хүнсний хүртээмжийг сайжруулахад чиглэх ёстойг онцолжээ. Энэ нь хүнсний хангамжийн тогтвортой байдлыг хангахын зэрэгцээ хүнсний аюулгүй байдал, шим тэжээлийн хүртээмжийг сайжруулахад чухал ач холбогдолтой юм.

Эх сурвалж: https://www.fao.org/