“Хүнсний хувьсгал” үндэсний хөдөлгөөний хүрээнд Булган аймаг газар тариалан, мал аж ахуй, хүнсний үйлдвэрлэлээ дэмжиж, иргэдийн хүнсний хэрэгцээг дотоодын бүтээгдэхүүнээр хангах, үйлдвэрлэгчдийн үйл ажиллагааг өргөжүүлэх чиглэлээр ажиллаж байна.
Булган аймгийн эдийн засгийн голлох салбар нь хөдөө аж ахуй бөгөөд аймгийн дотоодын нийт бүтээгдэхүүний 63 хувийг бүрдүүлдэг. Түүнчлэн улсын үр тарианы үйлдвэрлэлд чухал хувь нэмэр оруулдаг тус аймаг нь дотоодын хүнсний хангамжийг нэмэгдүүлэх, хөдөө аж ахуйн үйлдвэрлэлийг тогтвортой хөгжүүлэхэд гол үүрэг гүйцэтгэж байна.
Аймгийн Хүнс, хөдөө аж ахуйн газрын мэдээлснээр, аймгийн хүн амын төмс, гурилын хэрэгцээг дотоодын үйлдвэрлэлээр 100 хувь, хүнсний ногооны хэрэгцээний 70 гаруй хувийг хангаж байна. Энэ оны аравдугаар сарын эхний хагасын байдлаар аймгийн хэмжээнд төмс, хүнсний ногоо, тэжээлийн ургамлын ургац хураалт 64 хувийн гүйцэтгэлтэй байна.
Хүнсний үйлдвэрлэлийг нэмэгдүүлэх, боловсруулах үйлдвэрүүдийн хүчин чадлыг өргөжүүлэх зорилгоор “Хүнсний хувьсгал”-ын хүрээнд арилжааны банкуудаар дамжуулан аж ахуйн нэгжүүдэд жилийн 5-6 хувийн хүүтэй эргэлтийн болон хөрөнгө оруулалтын хөнгөлөлттэй зээл олгож байна.
Энэхүү санхүүгийн дэмжлэгийн үр дүнд “Хатан мээж хайрхан” зэрэг сүүний үйлдвэрүүд үйлдвэрлэлийн хүчин чадлаа нэмэгдүүлж, малчдаас өдөрт 10 тонн сүү худалдан авч байна. Ингэснээр малчид сүүгээ тогтмол борлуулах боломж нэмэгдэж, сүүний үйлдвэрүүд түүхий эдийн нийлүүлэлтээ тогтвортой байлгах, бүтээгдэхүүний нэр төрлөө олшруулах нөхцөл бүрджээ.
Мөн хөдөө аж ахуйн салбарт шаардлагатай мэргэжилтэй боловсон хүчин бэлтгэх, үйлдвэрлэлд шинжлэх ухааны ололт, дэвшилтэт технологи нэвтрүүлэхэд анхаарч байна. Энэ хүрээнд “Хүнсний хувьсгал” хөдөлгөөний мэргэжлийн салбар холбоо, Эрдэмтдийн салбар зөвлөлийг байгуулан ажиллуулж, ХААИС-ийн харьяа Хөдөө аж ахуйн мэргэжлийн ажилтан бэлтгэх Политехник коллежоор дамжуулан шаталсан сургалт, тэтгэлэгт хөтөлбөр хэрэгжүүлж байгаа аж.
Түүнчлэн Хөдөө аж ахуйн корпорацитай хамтран “Нутагтаа эзэн 100:1000” газар тариаланг эрчимжүүлэх төслийг хэрэгжүүлж байна. Энэ нь орон нутгийн газар тариалангийн үйлдвэрлэлийг нэмэгдүүлэх, тариаланчдын үйл ажиллагааг дэмжих, хөдөө аж ахуйн салбарын тогтвортой хөгжлийг хангахад чиглэж байна.
Цаашид Булган аймаг “Ухаалаг хөдөө аж ахуй” зорилтын хүрээнд үйлдвэрлэлийн бүтээмжийг нэмэгдүүлж, хүнсний бүтээгдэхүүний боловсруулах, хадгалах, түгээх тогтолцоог сайжруулахад анхаарч байна. Ингэснээр Хангайн бүсийн бусад аймгийг дотоодын хүнсний бүтээгдэхүүнээр хангах боломж өргөжиж, орон нутгийн үйлдвэрлэгчид зах зээлээ тэлэх, малчид, тариаланчдын орлогыг нэмэгдүүлэхийн зэрэгцээ иргэдийг чанартай, аюулгүй хүнсээр тогтвортой хангах нөхцөл бүрдэх юм.
Эх сурвалж: Монцамэ агентлаг
